ໃນຕອນບ່າຍຂອງວັນທີ 9 ເມສາ 2026ນີ້ ຢູູ່ທີ່ຫ້ອງປະຊຸມເບີ1ຊັ້ນ4ຫ້ອງວ່າການແຂວງວຽງຈັນ ໄດ້ຈັດໃຫ້ມີ ພິທີ ປະກາດບົ່ງຕົວແຕ່ງຕັ້ງເລຂາ ແລະ ຮອງເລຂາ ໜ່ວຍພັກຮາກຖານ ຄະນະໂຄສະນາອົບຮົມ ແຂວງວຽງຈັນ, ໂດຍການເປັນປະທານຂອງສະຫາຍ ພອນແກ້ວ ຂຸນພົນ ຮອງເລຂາຄະນະບໍລິຫານງານພັກແຂວງວຽງຈັນ, ຜູ້ຊີ້ນວຽກງານການເມືອງແນວຄິດ,ວຽກພັກພະນັກງານ, ມີສະຫາຍ ນາງ ຈັນທະຄອນ ສີອຳພອນ ກຳມະການປະຈຳພັກແຂວງ, ຫົວໜ້າຄະນະໂຄສະນາອົບຮົມ ແຂວງວຽງຈັນ, ມີເລຂາໜ່ວຍພັກອ້ອມຂ້າງ, ຄະນະໜ່ວຍພັກ, ພ້ອມດ້ວຍສະມາຊິກພັກພາຍໃນໜ່ວຍພັກດັ່ງກ່າວເຂົ້າຮ່ວມ.ໃນພິທີ ສະຫາຍ ສຸວັນຄຳ ອິນທິກຳລັງ ຫົວໜ້າຂະແໜງພັກ ຄະນະຈັດຕັ້ງແຂວງວຽງຈັນ ໄດ້ຂຶ້ນຜ່ານມະຕິຕົກລົງຂອງຄະນະປະຈຳພັກແຂວງວຽງຈັນ ວ່າດ້ວຍການຕົກລົງບົ່ງຕົວແຕ່ງຕັ້ງ ສະຫາຍ ນາງ ມະນີຈັນ ທຳມະໂຄດ ເປັນເລຂາ ໜ່ວຍພັກຮາກຖານ ຄະນະໂຄສະນາອົບຮົມ ແຂວງວຽງຈັນ ແລະ ບົ່ງຕົວແຕ່ງຕັ້ງ ສະຫາຍ ນາງ ຮັ່ງລີ ແກ້ວວິໄລສັກ ເປັນຮອງເລຂາ ໜ່ວຍພັກຮາກຖານ ຄະນະໂຄສະນາອົບຮົມ ແຂວງວຽງຈັນ ໃຫ້ກຽດມອບ ມະຕິຕົກລົງໃຫ້ທັງ2ສະຫາຍດັ່ງກ່າວ ໂດຍແມ່ນສະຫາຍ ພອນແກ້ວ ຂຸນພົນ ຮອງເລຂາຄະນະບໍລິຫານງານພັກແຂວງວຽງຈັນ, ພ້ອມທັງມີຄຳເຫັນໂອ້ລົມໃຫ້ ຄະນະໜ່ວຍພັກຮາກຖານ ຄະນະໂຄສະນາອົບຮົມແຂວງ ຕ້ອງໄດ້ເອົາໃຈໃສ່ປະຕິບັດຫຼັກການພື້ນຖານຂອງພັກ ເປັນຕົ້ນແມ່ນ ຫຼັກການລວມສູນປະຊາທິປະໄຕ, ເອົາໃຈໃສ່ການຍົກສູງບົດບາດການນຳພາຂອງການຈັດຕັ້ງພັກ ແລະ ຄວາມເປັນແບບຢ່າງນໍາໜ້າຂອງສະມາຊິກພັກ, ສ້າງຄວາມອາດສາມາດ ໃນການນຳພາຂອງຄະນະໜ່ວຍພັກ ເພື່ອບັນລຸຄາດໝາຍທີ່ມະຕິກອງປະຊຸມໃຫຍ່ຂອງພັກແຕ່ລະຂັ້ນ ກຳນົດໄວ້ຢ່າງແຂງແຮງ.
ຈັດຕັ້ງແບ່ງວຽກ, ແບ່ງງານ, ແບ່ງຄວາມຮັບຜິດຊອບພາຍໃນຄະນະພັກຄືນໃໝ່ໃຫ້ລະອຽດ,ຈະແຈ້ງ, ບົນພື້ນຖານເຄື່ອນໄຫວຖືກຕ້ອງຕາມພາລະບົດບາດຂອງໃຜລາວ, ຫຼີກເວັ້ນຄວາມຮັບຜິດຊອບລວມໆ, ບໍ່ແຈ້ງ, ພາລະບົດບາດຊ້ຳຊ້ອນ. ພ້ອມກັນນັ້ນ, ເມື່ອໝູ່ຄະນະ, ການຈັດຕັ້ງກໍຄືຂັ້ນເທິງມອບໝາຍໃຫ້ຮັບຜິດຊອບ ຕ້ອງເຊີດຊູຄວາມເປັນເຈົ້າການຕໍ່ໜ້າທີ່ການເມືອງ, ທຸ້ມເທເຫື່ອແຮງ, ສະຕິປັນຍາຄວາມຮູ້-ຄວາມສາມາດ, ມີຄວາມເສຍສະຫຼະ ແລະ ຄວາມສາມັກຄີພາຍໃນໃຫ້ ໜັກແໜ້ນ ເພື່ອເຮັດສໍາເລັດໜ້າທີ່ທີ່ຖືກມອບໝາຍ. ຢຶດໝັ້ນ ແລະ ປະຕິບັດຢ່າງເຂັ້ມງວດບັນດາຫຼັກການ, ລະບອບແບບແຜນວິທີນໍາພາ-ວິທີເຮັດວຽກຂອງພັກ ພາຍໃຕ້ການຊີ້ນໍາ-ບັນຊາ ແລະ ຄຸ້ມຄອງຫົວໜ້າດຽວ, ທັງມີຄວາມຮັບຜິດຊອບໂດຍກົງຕໍ່ຜົນໄດ້, ຜົນເສຍຂອງໜ້າທີ່ວຽກງານທີ່ຖືກມອບໝາຍ.
ໃຫ້ຂຸ້ນຂ້ຽວຄົ້ນຄວ້າ, ຈັດວາງ, ສັບຊ້ອນພະນັກງານ-ລັດຖະກອນ ເຂົ້າໃສ່ບັນດາໜ້າທີ່ວຽກງານຂອງແຕ່ລະຂະແໜງການຂອງຕົນ ຕາມເງື່ອນໄຂຕົວຈິງ ຕິດພັນກັບການກໍານົດພາລະບົດບາດ, ສິດ-ໜ້າທີ່ຂອງການຈັດຕັ້ງ, ເປັນເສນາທິການໃຫ້ແກ່ຄະນະປະຈໍາພັກແຂວງ; ພ້ອມດຽວກັນນັ້ນ, ກໍຕ້ອງໄດ້ຮ່າງເປັນມະຕິຕົກລົງຂອງຄະນະໜ່ວຍພັກ, ເພື່ອເປັນບ່ອນອີງໃນການເຄື່ອນໄຫວຈັດຕັ້ງປະຕິບັດໜ້າທີ່ວຽກງານ ຢ່າງຖືກຕ້ອງສອດຄ່ອງ.
ຕ້ອງສຶກສາອົບຮົມວຽກງານການເມືອງ-ແນວຄິດ ໃຫ້ສະມາຊິກພັກ, ພະນັກງານ-ລັດ ຖະກອນ ຂອງຕົນ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ, ມີຄວາມສາມັກຄີ ແລະ ເປັນເອກະພາບສູງ ໃນການປັບປຸງກົງຈັກການຈັດຕັ້ງໃນຄັ້ງນີ້; ແນໃສ່ສ້າງສະພາບແວດລ້ອມໃຫ້ພາຍໃນການຈັດຕັ້ງ ມີຄວາມສະຫງົບ, ອຸ່ນອ່ຽນ, ທຸ່ນທ່ຽງ, ໃຫ້ການຮ່ວມມື, ສະໜັບ-ສະໜູນການປະຕິບັດໜ້າທີ່ວຽກງານເຊິ່ງກັນ ແລະ ກັນ (ບໍ່ໃຫ້ມີເກີດແນວຄິດ ສັບສົນຕໍ່ແນວທາງນະໂຍບາຍຂອງພັກ). ທັງມີຄວາມເຊື່ອໝັ້ນຕໍ່ການນຳພາຂອງພັກ ແລະ ການຄຸ້ມຄອງຂອງລັດ ເວົ້າລວມ, ເວົ້າສະເພາະ ກໍຄືຄະນະພັກຂອງພວກສະຫາຍ. ພ້ອມກັນເຊີດຊູຈິດໃຈເອກະລາດ, ເປັນເຈົ້າຕົນເອງ, ເພິ່ງຕົນເອງ, ສ້າງຄວາມເຂັ້ມແຂວງດ້ວຍຕົນເອງ, ມີຄວາມຄວາມຮັບຜິດຊອບສູງຕໍ່ໜ້າທີ່ການເມືອງ, ທຸ້ມເທເຫື່ອແຮງ, ສະຕິປັນຍາ, ຄວາມຮູ້-ຄວາມສາມາດ, ມີຄວາມເສຍສະຫຼະ ເພື່ອເຮັດສຳເລັດໜ້າທີ່ຕາມການມອບໝາຍ, ມີລະບຽບວິໄນ, ດໍາລົງຊີວິດທີ່ປອດໃສ ຕິດພັນກັບການບໍາລຸງ-ກໍ່ສ້າງຖັນແຖວສະມາຊິກພັກ, ພະ ນັກງານ-ລັດຖະກອນ ມີຄຸນທາດການເມືອງ, ຄຸນສົມບັດສິນທຳປະຕິວັດທີ່ ໜັກແໜ້ນ ມີຄວາມຊຳນິ-ຊຳນານງານ (ກາຍເປັນມືອາຊີບ), ມີຈັນຍາບັນ-ຈັນຍາທຳ ເພື່ອຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງ ກໍຄື ບັນດາໜ້າທີ່ວຽກງານໃນສະເພາະໜ້າ ແລະ ຍາວນານ.
