ວັນທີ 23 ສິງຫາ 1975 ແມ່ນມື້ທີ່ມີຄວາມໝາຍປະຫວັດສາດຢ່າງຍິ່ງໃຫຍ່ຂອງຊາດລາວເຮົາ. ມັນເປັນວັນທີ່ປະຊາຊົນລາວບັນດາເຜົ່າ ພາຍໃຕ້ການນໍາພາຂອງພັກປະຊາຊົນ ປະຕິວັດລາວ ໄດ້ພ້ອມກັນລຸກປະຮື້ຂຶ້ນຢຶດອໍານາດການປົກຄອງໃນທົ່ວປະເທດດ້ວຍ “3 ບາດຄ້ອນຍຸດທະສາດ” ໂດຍບໍ່ໄດ້ເສຍເລືອດເນື້ອ, ລົບລ້າງລະບອບສັກດີນາ ແລະ ອາລັກຂາຂອງຕ່າງຊາດ, ສ້າງກຽດປະຫວັດສາດນໍາພາປະເທດຊາດໄປສູ່ຍຸກສະໄໝໃໝ່-ຍຸກສະໄໝແຫ່ງເອກະລາດ, ອິດສະຫຼະພາບ ແລະ ຄວາມຈະເລີນຮຸ່ງເຮືອງ.ການລຸກປະຮື້ຂຶ້ນຢຶດອໍານາດ 23 ສິງຫາ ບໍ່ພຽງແຕ່ແມ່ນໄຊຊະນະທາງດ້ານການເມືອງ ແລະ ການທະຫານເທົ່ານັ້ນ, ແຕ່ຍັງແມ່ນໝາກຜົນຂອງຄວາມສາມັກຄີປະຊາຊົນບັນດາເຜົ່າ ທີ່ໄດ້ອຸທິດຊີວິດ, ເຫື່ອແຮງ ແລະ ສະຕິປັນຍາ ເພື່ອປົດປ່ອຍປະເທດຊາດ. ມູນເຊື້ອອັນລ້ໍາຄ່ານີ້ໄດ້ກາຍເປັນໄຟເຍືອງທາງ ໃຫ້ແກ່ການປົກປັກຮັກສາ ແລະ ພັດທະນາປະເທດຊາດມາຮອດປະຈຸບັນ.
ສະນັ້ນ, ເພື່ອສືບທອດມູນເຊື້ອດັ່ງກ່າວພວກເຮົາຕ້ອງ :
- ເສີມຂະຫຍາຍນ້ໍາໃຈຮັກຊາດ: ສຶກສາອົບຮົມໃຫ້ພະນັກງານ, ທະຫານ, ຕໍາຫຼວດ ແລະ ປະຊາຊົນ ໂດຍສະເພາະຮຸ່ນໜຸ່ມນ້ອຍ ໃຫ້ເຫັນຄຸນຄ່າຂອງເອກະລາດ ແລະ ຄວາມສະຫງົບສຸກທີ່ໄດ້ມາດ້ວຍຄວາມຍາກລໍາບາກ.
- ເພີ່ມພູນຄູນສ້າງຄວາມສາມັກຄີ: ສືບຕໍ່ຮັກສາ ແລະ ເສີມຂະຫຍາຍມູນເຊື້ອຄວາມສາມັກຄີເປັນເອກະພາບອັນໜຶ່ງອັນດຽວກັນ ລະຫວ່າງ ພັກ, ລັດ ແລະ ປະຊາຊົນ.
- ຕັ້ງໜ້າເຂົ້າຮ່ວມຂະບວນການແຂ່ງຂັນຮັກຊາດ ແລະ ພັດທະນາ: ຫັນເອົານ້ໍາໃຈ 23 ສິງຫາ ໃຫ້ກາຍເປັນການກະທໍາຕົວຈິງ ໃນການອອກແຮງງານຜະລິດ, ການສຶກສາຮ່ໍາຮຽນ, ການພັດທະນາເສດ ຖະກິດ-ສົງຄົມ ແລະ ການປົກປັກຮັກສາຄວາມສະຫງົບຂອງບ້ານເມືອງ.
ເນື່ອງໃນໂອກາດວັນປະຫວັດສາດນີ້, ຂໍເຊີນຊວນທຸກພາກສ່ວນ ຈົ່ງພ້ອມກັນທຸ້ມເທສະຕິປັນຍາ ແລະ ເຫື່ອແຮງ ເຂົ້າໃນການສ້າງສາພັດທະນາປະເທດຊາດ ໃຫ້ປະເທດຊາດມັ່ງຄັ່ງ ເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີປອງດອງ, ປະຊາທິປະໄຕ, ຍຸຕິທຳ ແລະ ສີວິໄລ.
