ທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດ ແຫ່ງ ສປປ ລາວ ລົງເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງວຽງຈັນ.
ໃນຕອນເຊົ້າວັນທີ 14 ທັນວາ 2023, ເວລາ 8:00 ໂມງ ຢູ່ທີ່ສະໂມສອນຫ້ອງວ່າການແຂວງວຽງຈັນ ໄດ້ຈັດພິທີຕ້ອນຮັບການມາຢ້ຽມຢາມ ແລະ ເຮັດວຽກຂອງ ທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດ ແຫ່ງ ສປປ ລາວ ພ້ອມດ້ວຍຄະນະ, ໃຫ້ກຽດຕ້ອນຮັບໂດຍ ທ່ານ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງວຽງຈັນ, ມີບັນດາທ່ານລັດຖະມົນຕີ, ຮອງລັດຖະມົນຕີ ກະຊວງ, ບັນດາທ່ານຄະນະປະຈຳພັກແຂວງ, ກຳມະການພັກແຂວງ ພ້ອມດ້ວຍພະນັກງານຫຼັກແຫຼ່ງຂອງແຂວງວຽງຈັນ ເຂົ້າຮ່ວມຢ່າງເປັນຂະບວນ.
ທ່ານ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງວຽງຈັນ ໄດ້ລາຍງານສະພາບການຈັດຕັ້ງປະຕິບັດວຽກງານຮອບດ້ານຂອງແຂວງ ປະຈຳປີ 2023 ແລະ ທິດທາງແຜນການ ປີ 2024 ຊຶ່ງສະແດງໃຫ້ເຫັນວ່າເສດຖະກິດມີການຂະຫຍາຍຕົວຢ່າງຕໍ່ເນື່ອງ, ລວມຍອດຜະລິດຕະພັນພາຍໃນ (GDP) ຂະຫຍາຍຕົວ 4,7%, ເທົ່າກັບ 97,91% ຂອງແຜນການ, ຄິດເປັນມູນຄ່າໃນລາຄາປັດຈຸບັນໄດ້ 9.704 ຕື້ກີບ, ສະເລ່ຍຕໍ່ຫົວຄົນໄດ້ 19,93 ລ້ານກີບ ຫຼື 1.308 ໂດລາ, ເທົ່າກັບ 97,46% ຂອງແຜນການ (ແຜນ 1.342 ໂດລາ). ການເກັບລາຍຮັບໄດ້ 266,75 ຕື້ກີບ, ເທົ່າກັບ 90,54% ຂອງແຜນການ ແລະ ຄາດຄະເນໝົດປີຈະໄດ້ 346,81 ຕື້ກີບ, ເທົ່າກັບ 117,71% ຂອງແຜນການ, ທຽບໃສ່ປີຜ່ານມາ ເພີ່ມຂຶ້ນ 10,47%. ການຄຸ້ມຄອງລາຍຈ່າຍໄດ້ 665,52 ຕື້ກີບ, ເທົ່າກັບ 90,75% ຂອງແຜນການ. ການແກ້ໄຂຄວາມທຸກຍາກຂອງປະຊາຊົນ ສາມາດລຶບລ້າງບ້ານທຸກຍາກໄດ້ຢ່າງສິ້ນເຊີງ ແລະ ຄອບຄົວບໍ່ພົ້ນທຸກ ຍັງເຫຼືອ 4,72 %.
ວຽກງານໃນ 1 ປີ ຕໍ່ໜ້າ ເລັ່ງສຸມໃສ່ການເກັບລາຍຮັບເຂົ້າງົບປະມານ ໃຫ້ໄດ້ປະມານ 252,77 ຕື້ກີບ ແລະ ຄຸ້ມຄອງລາຍຈ່າຍຕາມແຜນທີ່ກຳນົດໄວ້ ປະມານ 521,51 ຕື້ກີບ, ຄຸ້ມຄອງໂຄງການຂຸກຄົ້ນແຮ່ທາດທັງແບບປົກະຕິ, ແບບທົດລອງ ໃຫ້ມີປະສິດທິພາບ ແລະ ປະສິດທິຜົນ, ສົ່ງເສີມການນໍາໃຊ້ເຕັກໂນໂລຊີ (Digital) ເຂົ້າໃນທຸກຂົງເຂດວຽກງານຂອງແຂວງ-ເມືອງ ເພື່ອຂັບເຄື່ອນການພັດທະນາເສດຖະກິດ-ສັງຄົມ ຫັນເປັນທັນສະໄໝຫຼາຍຂຶ້ນ, ສູ້ຊົນລຶບລ້າງຄວາມທຸກຍາກ ໃຫ້ໄດ້ 1.810 ຄອບຄົວ, ກວມເອົາ 2,92 % ແລະ ອື່ນໆ ເພື່ອເຮັດໃຫ້ລວມຍອດຜະລິດຕະພັນພາຍໃນ (GDP) ຂະຫຍາຍຕົວໃນລະດັບ 5,4%, ຄິດເປັນມູນຄ່າໃນປິ 11.189 ຕື້ກີບ, ສະເລ່ຍຕໍ່ຫົວຄົນ ໃຫ້ໄດ້ 1.191 ໂດລາ ຫຼື 22,87 ລ້ານກີບ, ເພີ່ມທະວີການນຳພາ-ຊີ້ນຳ ວຽກງານກໍ່ສ້າງຮາກຖານການເມືອງ, ພັດທະນະຊົນນະບົດ, ລຶບລ້າງຄວາມທຸກຍາກ ຕິດພັນກັບວຽກງານ 3 ສ້າງ ຕາມດຳລັດ 348 / ລບ ເພື່ອຍົກລະດັບຊີວິດການເປັນຢູ່ຂອງປະຊາຊົນບັນດາເຜົ່າ ໃຫ້ດີຂຶ້ນເທື່ອລະກ້າວ, ຊຸກຍູ້ການຈັດຕັ້ງປະຕິບັດແຜນການລຶບລ້າງຄວາມທຸກຍາກຂອງແຂວງ ໃຫ້ໄດ້ຕາມຄາດໝາຍທີ່ວາງໄວ້ ຄື: ລຶບລ້າງຄອບຄົວທຸກຍາກໃຫ້ໄດ້ 1.810 ຄອບຄົວ, ກວມເອົາ 2,92%, ປີ 2025 ໃຫ້ໄດ້ 1.190 ຄອບຄົວ ກວມເອົາ 1,51% ແລະ ຍັງເຫຼືອ 720 ຄອບຄົວ ເທົ່າກັບ 0,91% ແລະ ປະກາດຮັບຮອງເອົາຈຸດສຸມພັດທະນາກຸ່ມບ້ານຜາສັງ ເມືອງເຟືອງ ເປັນຕົວເມືອງໃນຊົນນະບົດ ໃນວັນທີ 5 ມັງກອນ 2024 ໃຫ້ສຳເລັດ.
ໃນໂອກາດທີ່ມີຄວາມໝາຍສຳຄັນນີ້ ຍັງໄດ້ຮັບຟັງການໂອ້ລົມຂອງ ທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດ ແຫ່ງ ສປປ ລາວ ຊຶ່ງໄດ້ເນັ້ນໜັກໃຫ້ບັນດາການນຳຂອງແຂວງ ເພີ່ມທະວີການນຳພາ-ຊີ້ນຳ ໃຫ້ຫຼາຍຂຶ້ນກວ່າເກົ່າ ໂດຍສະເພາະ ວຽກງານການສຶກສາການເມືອງ-ແນວ ຄິດ ໃຫ້ແກ່ສະມາຊິກພັກ, ພະນັກງານ, ທະຫານ, ຕຳຫຼວດ ຕະຫຼອດຮອດປະຊາຊົນບັນດາເຜົ່າ ໃຫ້ກຳແໜ້ນແນວທາງການປ່ຽນແປງຂອງພັກ, ຮັບຮູ້ສະພາບການຂອງໂລກຢ່າງແທ້ຈິງ, ມີຄວາມເຊື່ອໝັ້ນຕໍ່ບົດບາດການນຳພາຂອງພັກ-ລັດ, ການແກ້ບັນຫາຄວາມຫຍຸ້ງຍາກ, ວິກິດການຕ່າງໆ ຢູ່ພາຍໃນປະເທດ, ບ້ານ-ເມືອງ ໂດຍສະເພາະ ການແກ້ໄຂບັນຫາດ້ານວິກິດການເງິນ ທີ່ປະເທດເຮົາກຳລັງປະເຊີນຢູ່ໃນປະຈຸບັນ; ເອົາໃຈໃສ່ເສີມຂະຫຍາຍ, ນຳໃຊ້ທ່າແຮງບົ່ມຊ້ອນທີ່ມີຂອງແຂວງ ເພື່ອນຳມາສ້າງສາພັດທະນາແຂວງ ໃຫ້ຈະເລີນກ້າວໜ້າ, ຫຼຸດຜ່ອນຄວາມທຸກຍາກຂອງປະຊາຊົນບັນດາເຜົ່າ ທີ່ເປັນສິ່ງກີດຂວາງການພັດທະນາ ໃຫ້ໝົດໄປເທື່ອລະກ້າວ. ທ່ານຍັງໄດ້ຮຽກຮ້ອງມາຍັງຄະນະພັກແຂວງວຽງຈັນ ເອົາໃຈໃສ່ໃນການກະກຽມຄວາມພ້ອມ ໃຫ້ແກ່ການດຳເນີນກອງປະຊຸມໃຫຍ່ 3 ຂັ້ນ ຂອງພັກ ໃຫ້ມີຄວາມຮອບຄອບ, ສອດຄ່ອງກັບສະພາບຕົວຈິງ ແລະ ຖືກຕ້ອງຕາມລະບຽບຂອງການດຳເນີນກອງປະຊຸມໃຫຍ່ຂອງພັກ ຕິດພັນກັບການຖືເອົາວຽກງານປ້ອງກັນຊາດ-ປ້ອງກັນຄວາມສະຫງົບ ເປັນພື້ນຖານ, ເປັນປັດໄຈຮັບປະກັນໃຫ້ແກ່ຂົງເຂດວຽກງານອື່ນໆ ແລະ ຍົກສູງໃຫ້ເປັນໜ້າທີ່ຂອງທົ່ວປວງຊົນລາວບັນດາເຜົ່າ ເວົ້າລວມ, ເວົ້າສະເພາະ ກໍແມ່ນຊາວແຂວງວຽງຈັນ.
ໃນໂອກາດທີ່ມາຢ້ຽມຢາມ ແລະ ເຄື່ອນໄຫວວຽກງານຢູ່ແຂວງວຽງຈັນ ຄັ້ງນີ້ ບັນດາທ່ານ ກໍໄດ້ລົງຢ້ຽມຢາມ ຟາມລ້ຽງສັດຄຳພູວອນ ຢູ່ເມືອງໂພນໂຮງ ຊຶ່ງເປັນຟາມລ້ຽງສັດຂອງຄົນລາວ, ມີເນື້ອທີ່ປະມານ 20 ກວ່າເຮັກຕາ, ມີໝູ 6.000 ກວ່າໂຕ, ໄກ່ 3.000 ກວ່າໂຕ, ຢ້ຽມຢາມໂຄງການກໍ່ສ້າງສະຖານີເຄື່ອນຖ່າຍສິນຄ້າ ແລວທາງລົດໄຟ ລາວ-ຈີນ ຈຸດຜ່ານແຂວງວຽງຈັນ ແລະ ເຂື່ອນໄຟຟ້ານຳ້ມັງ 3 ຢູ່ເມືອງທຸລະຄົມ, ຈາກນັ້ນ ຄະນະນຳຂັ້ນສູງການ ຈຶ່ງເດີນທາງກັບຄືນດ້ວຍຄວາມສະຫວັດດີພາບ.
