ໃນຕອນເຊົ້າຂອງວັນທີ 28 ພະຈິກ 2024 ເວລາ 8:30 ໂມງ ແລະ ດໍາເນີນໄປເປັນເວລາ 1 ຕອນ ທີ່ຫ້ອງປະຊຸມໃຫຍ່ຫ້ອງວ່າການແຂວງວຽງຈັນ, ຄະນະໂຄສະນາອົບຮົມແຂວງ ໄປສົມທົບກັບຫ້ອງວ່າການແຂວງ, ຈັດພິທີ ປາຖະກະຖາ ວັນຊາດທີ 2 ທັນວາ ຄົບຮອບ 49 ປີ ແລະ ວັນຄ້າຍວັນເກີດຂອງປະທານ ໄກສອນ ພົມວິຫານ ຄົບຮອບ 104 ປີ ໃຫ້ກຽດເປັນປະທານ ແລະ ຂື້ນປາຖະກະຖາ ໂດຍ ທ່ານ ຄໍາພັນ ສິດທິດໍາພາ ກໍາມະການສູນກາງພັກ, ເລຂາພັກແຂວງ ເຈົ້າແຂວງວຽງຈັນ, ມີບັນດາທ່ານ ຄະນະປະຈໍາພັກແຂວງ, ກໍາມະການພັກແຂວງ, ນາຍ ແລະ ພົນທະຫານ, ນາຍ ແລະ ພົນຕໍາຫຼວດ, ພະນັກງານຫຼັກແຫຼ່ງ ຂອງບັນດາພະແນກການ, ອົງການ, ກົມກອງ ອ້ອມຂ້າງແຂວງ ພ້ອມດ້ວຍນັກຮຽນ-ນັກສຶກສາ ເຂົ້າຮ່ວມທັງໝົດ 207 ທ່ານ, ຍິງ 62 ທ່ານ.
ໃນພິທີດັ່ງກ່າວ ປະທານ ໄດ້ຍົກໃຫ້ເຫັນ ປະຫວັດຄວາມເປັນມາ, ຄວາມໝາຍຄວາມສໍາຄັນຂອງວັນ 2 ວັນສໍາຄັນດັ່ງກ່າວ ເຊີ່ງມີການພົວພັນຢ່າງສະໜິດແໜ້ນ ໃນພາລະກິດຕໍ່ສູ້ປົດປ່ອຍຊາດໂດຍມີການນໍາພາອັນສະຫຼາດສ່ອງໃສ ຂອງພັກປະຊາຊົນ ປະຕິວັດລາວ, ປະທາານ ໄກສອນພົມວິຫານ ເປັນຜູ້ທີ່ມີຄຸນທາດການເມືອງ, ຄຸນສົມບັດສິນທໍາປະຕິວັດ, ມີນໍ້າໃຈຮັກຊາດ ຮັກປະຊາຊົນ ອັນດູດດື່ມ, ເປັນລູກຮັກຫຼານແພງ ຂອງປະຊາຊົນລາວ ແລະ ເປັນວິລະບູຫຼຸດຂອງຊາດລາວ, ການດໍາລົງຊີວິດ ແລະ ການເຄື່ອນໄຫວ ຂອງເພີ່ນ ແມ່ນຕິພັນຢ່າງສະໜິແໜ້ນ ກັບພາລະກິດນໍາພາປວງຊົນລາວຕໍ່ຕ້ານການຮຸກຮານ ຂອງຈັກກະພັດ ທັງແບບເກົ່າ ແລະ ແບບໃໝ່ ຈົນສາມາດຍາດໄດ້ໄຊສະນະເປັນແຕ່ລະໄລຍະ ແລະ ສາມາດ ສະຖາປານາ ສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ່ 2 ທັນວາ 1975 ໄດ້ຢ່າງສະງ່າຜ່າເຜີຍ.
ພວກເຮົາເປັນຄົນຮຸ່ນຫຼັງ ຄວນສືບຕໍ່ຮັກສາໄດ້ມູນເຊື້ອອັນອົງອາດກ້າຫານ ຄວາມສາມັກຄີ, ນໍ້າໃຈເສຍສະຫຼະ ແລະ ຈົດຈໍາຄຸນງາມຄວາມດີ ແລະ ຮູ້ບຸນຄຸນ ຕໍ່ບັນດານັກຮົບວິລະຊົນ ປະຊາຊົນລາວບັນດາເຜົ່າ ທີ່ໄດ້ເສຍສະຫຼະເລືອດເນື້ອ ເພື່ອປະເທດຊາດ ແລະ ເພື່ອປະຊາຊົນໄວ້ຕະຫຼອດໄປ
ໃນຕອນທ້າຍ ທ່ານໄດ້ເຮືອກຮ້ອງໃຫ້ທຸກພາກສ່ວນສືບຕໍ່ຄົ້ນຄວ້າຮໍ່າຮຽນເອົາມູນເຊື້ອ ອັນພິລະອາດຫານຂອງຊາດລາວ ໃນການຕໍ່ສູ້ປົດປ່ອຍຊາດ, ຮໍ່າຮຽນເອົາບົດຮຽນ ແລະ ຜົນງານການເຄື່ອນໄຫວຄຸນສົມບັດສິນທໍາປະຕິວັດ ນໍ້າໃຈຮັກຊາດ ຂອງປະທານ ໄກສອນ ພົມວິຫານ ເພື່ອສຶກສາອົບຮົມໃຫ້ເປັນສະມາຊິກພັກ-ພະນັກງານ, ພໍ່ແມ່ປະຊາຊົນ ແລະ ຄົນຮຸ່ນໜຸ່ມໃຫ້ມີຄວາມເຂົ້າໃຈ ແລະ ເອກອ້າງທະນົງໃຈ ໃນຄວາມເປັນຊາດລາວເພື່ອພ້ອມກັນສ້າງສາພັດທະນາປະເທດຊາດ ໃຫ້ຈະເລີນກ່າວໜ້າ.
ພິທີດັ່ງກ່າວ ໄດ້ປິດລົງດ້ວຍຜົນສໍາເລັດຢ່າງຈົບງາມ ເວລາ 11: 30 ໂມງ ຂອງວັນດຽວກັນ.
