ໃນວັນທີ 29 – 30 ເມສາ 2024 ກົມຂໍ້ມູນຂ່າວສານ ແລະ ຝຶກອົບຮົມ ຂອງຄະນະຄະນະໂຄສະນາອົບຮົມສູນກາງພັກ ສົມທົບກັບຄະນະໂຄສະນາອົບຮົມແຂວງວຽງຈັນ ຈັດຊຸດຝຶກອົບຮົມຄວາມຮູ້ພື້ນຖານ ກ່ຽວກັບຄອມພິວເຕີ ແລະ ການບຳລຸງຮັກສາຄອມພິວເຕີ, ຢູ່ທີ່ຫ້ອງປະຊຸມ ຄະນະກວດກາພັກແຂວງ. ໂດຍການເຂົ້າຮ່ວມເປັນປະທານຂອງທ່ານ ວັນຕຸລາ ຣັກນຸດ ຄະນະພັກ, ຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ (ຄອສພ), ທ່ານ ສີທົນ ແສງພະຈັນ ກຳມະການພັກແຂວງ, ເລຂາໜ່ວຍພັກ, ຫົວໜ້າຄະນະໂຄສະນາອົບຮົມແຂວງ, ມີຄະນະຮັບຜິດຊອບຂັ້ນສູນກາງ-ແຂວງ, ນັກຝຶກອົບຮົມຈາກ ຄະນະໂຄສະນາອົບຮົມແຂວງ ແລະ ຄະນະໂຄສະນາອົບຮົມ 11 ເມືອງ ເຂົ້າຮ່ວມທັງໝົດ 34 ທ່ານ, ຍິງ 18 ທ່ານ, ເປັນນັກສຳມະນາກອນ 22 ທ່ານ, ຍິງ 15 ທ່ານ.
ການຈັດຊຸດຝຶກອົບຮົມດັ່ງກ່າວ ແມ່ນເພື່ອເປັນການຍົກລະດັບຄວາມຮູ້ ຄວາມສາມາດ ທາງດ້ານຄວາມຮູ້ພື້ນຖານ ກ່ຽວກັບຄອມພິວເຕີ, ການຕິດຕັ້ງລະບົບວິນໂດ້, ໂປຼແກຼມຕ່າງໆ ແລະ ການແກ້ໄຂບັນຫາ ຄອມພີວເຕີເບື້ອງຕົ້ນ ເພື່ອນຳໃຊ້ເຂົ້າໃນວຽກງານໂຄສະນາອົບຮົມ ແຕ່ລະຂັ້ນ, ເຂົ້າໃນການຈັດຕັ້ງຜັນຂະຫຍາຍແນວທາງນະໂຍບາຍຂອງພັກ ໃຫ້ມີປະສິດທິພາບ, ມີຄວາມກ້າວໜ້າທາງດ້ານເຕັກໂນໂລຊີ ຕາມທິດຫັນວຽກງານໂຄສະນາອົບຮົມ ໄປສູ່ຄຸນນະພາບໃໝ່ທີ່ທັນສະໄໝ. ເນື່ອງຈາກວ່າ ປັດຈຸບັນ ຖັນແຖວພະນັກງານຈຳນວນໜຶ່ງ ທີ່ເຮັດວຽກງານໄອທີ ຂອງຄະນະໂຄສະນາອົບຮົມ ຍັງບໍ່ທັນມີຄວາມຊຳນິຊຳນານດ້ານຄອມພີວເຕີ, ຈຶ່ງເຫັນວ່າມີຄວາມຈຳເປັນຕ້ອງໄດ້ຈັດຝຶກອົບຮົມວຽກງານດັ່ງກ່າວນີ້ ເປັນເວລາ 2 ວັນ ແລະ ພາຍຫຼັງສຳເລັດການຝຶກຕົວຈິງສຳເລັດ ຈຶ່ງໄດ້ມອບໃບຢັ້ງຢືນໃຫ້ນັກສຳມະນາກອນ, ໃຫ້ກຽດມອບໂດຍທ່ານ ວັນຕຸລາ ຣັກນຸດ ຄະນະພັກ, ຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ (ຄອສພ).
ຕອນທ້າຍພິທີ ໄດ້ຮັບຟັງການໂອ້ລົມຂອງ ທ່ານ ສຸລະພົນ ພົດມີໄຊ ຮອງຫົວໜ້າຄະນະໂຄສະນາອົບຮົມແຂວງວຽງຈັນ ຊຶ່ງທ່ານໄດ້ຍ້ອງຍໍຊົມເຊີຍຕໍ່ຜົນສຳເລັດໃນການຝຶກອົບຮົມ ຄັ້ງນີ້, ເພື່ອໃຫ້ນັກຝຶກອົບຮົມ ສືບຕໍ່ນຳເອົາຄວາມຮູ້ ແລະ ບົດຮຽນໄປໝູນໃຊ້ໃນການເຄື່ອນໄຫວວຽກງານໄອທີ ຢູ່ຂັ້ນແຂວງ ແລະ ເມືອງ ໃຫ້ມີປະສິດທິຜົນດີຂຶ້ນເລື້ອຍໆ. ທ່ານໄດ້ເນັ້ນໜັກຕື່ມບາງບັນຫາ ຄື: ນັກຝຶກອົບຮົມທຸກທ່ານ ຕ້ອງເອົາໃຈໃສ່ຄົ້ນຄວ້າເຊື່ອມຊຶມ, ກຳແໜ້ນບົດຮຽນ, ບວກໃສ່ພາກປະຕິບັດຕົວຈິງ ໂດຍສະເພາະແມ່ນ ບັນດາເນື້ອໃນເອກະສານທີ່ໄດ້ອົບຮົມ ຄັ້ງນີ້ ໄປຈັດຕັ້ງປະຕິບັດວຽກງານໃຫ້ມີປະສິດທິຜົນສູງຂຶ້ນກວ່າເກົ່າ. ພ້ອມກັນນີ້ ກໍຕ້ອງເອົາໃຈໃສ່ປັບປຸງຍົກສູງຄຸນນະພາບຂອງພະນັກງານ, ເຄື່ອງມືເຕັກໂນໂລຊີທີ່ທັນສະໄໝ, ຍົກລະດັບຄວາມຮູ້ທາງດ້ານໄອທີ, ການຮັກສາຄວາມປອດໄພຂອງຂໍ້ມູນ, ການຄຸ້ມຄອງລະບົບເຄື່ອຂ່າຍອິນເຕີເນັດ ແລະ ບຳລຸງຮັກສາເຄື່ອງມືເອເລັກໂຕຼນິກ ເພື່ອເຮັດໃຫ້ການນຳໃຊ້ລະບົບຄອມພິວເຕີ ມີຄວາມສະດວກ ວ່ອງໄວ. ເພື່ອປັບປຸງວຽກງານໂຄສະນາອົບຮົມ ໃຫ້ມີຄຸນນະພາບ ແລະ ທົ່ວເຖິງເປົ້າໝາຍຕ່າງໆ ຢ່າງກວ້າງຂວາງ. ຊຸດຝຶກອົບຮົມໄດ້ປິດລົງ ດ້ວຍຜົນສຳເລັດ ຕາມຄາດໝາຍທີ່ວາງໄວ້.
