ພິທີດັ່ງກ່າວໄດ້ຈັດຂຶ້ນໃນວັນທີ 18 ທັນວາ 2025 ທີ່ຫ້ອງປະຊຸມເມືອງວຽງຄໍາ ແຂວງວຽງຈັນ, ໂດຍການເປັນປະທານຂອງ ສະຫາຍ ພູທະນູເພັດ ໄຊສົມບັດ ເລຂາຄະນະບໍລິຫານງານພັກແຂວງວຽງຈັນ, ໃຫ້ກຽດເຂົ້າຮ່ວມມີ ສະຫາຍ ສີທົນ ແສງພະຈັນ ກຳມະການປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງ, ສະຫາຍ ສົມໝາຍ ໄຊຍະວົງ ກຳມະການພັກແຂວງ, ເລຂາຄະນະບໍລິຫານງານພັກເມືອງວຽງຄຳ, ມີບັນດາສະຫາຍຮອງເລຂາພັກເມືອງ, ຄະນະປະຈໍາພັກເມືອງ, ກໍາມະການພັກເມືອງ, ພ້ອມດ້ວຍບັນດາຫົວໜ້າຫ້ອງການ, ເລຂາຄະນະພັກຮາກຖານ, ໜ່ວຍພັກ, ກຸ່ມບ້ານ, ເລຂາພັກບ້ານ-ນາຍບ້ານ, ສະມາຊິກພັກ ແລະ ພະນັກງານຫຼັກແຫຼ່ງຂອງເມືອງວຽງຄໍາ ເຂົ້າຮ່ວມ.
ໃນກອງປະຊຸມຄັ້ງນີ້ ສະຫາຍ ພູທະນູເພັດ ໄຊສົມບັດ ໄດ້ກ່າວບາງຕອນວ່າ: ການເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ຜູ້ແທນອົງຄະນະພັກແຂວງວຽງຈັນ ສະໄໝທີ VII ຄັ້ງນີ້ ຈະໄດ້ພ້ອມພາກັນຮັບຟັງການເຊື່ອມຊຶມເອກະສານສຳຄັນ 3 ສະບັບ ຄື: ມະຕິກອງປະຊຸມໃຫຍ່ຜູ້ແທນອົງຄະນະພັກແຂວງວຽງຈັນ ສະໄໝທີ VII, ບົດຜັນຂະຫຍາຍເນື້ອໃນລາຍງານການເມືອງຕໍ່ກອງປະຊຸມໃຫຍ່ ຜູ້ແທນອົງຄະນະພັກແຂວງວຽງຈັນ ແລະ ແຜນພັດທະນາເສດຖະກິດ-ສັງຄົມ 05 ປີ ຄັ້ງທີ VII (2026-2030). ການເຊື່ອມຊຶມບັນດາເອກະສານສຳຄັນຄັ້ງນີ້ ເພື່ອເປັນການຍົກສູງບົດບາດການນໍາພາຂອງຄະນະພັກແຕ່ລະຂັ້ນ; ເພື່ອເພີ່ມທະວີໃນການສ້າງແຂວງໃຫ້ເປັນຫົວໜ່ວຍຍຸດທະສາດຢ່າງໜັກ ແໜ້ນ; ເພື່ອພ້ອມກັນຕັ້ງໜ້າສ້າງເສດຖະກິດເອກະລາດເປັນເຈົ້າຕົນເອງ ແລະ ເພື່ອເປັນການສຸມໃສ່ແກ້ໄຂຄວາມທຸກຍາກຂອງປະຊາຊົນໃຫ້ໄດ້ໂດຍພື້ນຖານເທື່ອລະກ້າວ.
ສະຫາຍເລຂາຄະນະບໍລິຫານງານພັກແຂວງ ກ່າວອີກວ່າ: ແຂວງວຽງຈັນ ຍັງມີອິກຫຼາຍດ້ານທີ່ຕ້ອງໄດ້ເອົາໃຈໃສ່ບຸກບືນສູ້ຊົນ ຢ່າງແຂງແຮງ ແລະ ດ້ວຍຈິດໃຈບຸກທະລຸຂຶ້ນຕື່ມ ເປັນຕົ້ນແມ່ນ ການແກ້ໄຂຄວາມທຸກຍາກ ຂອງປະຊາຊົນບັນດາເຜົ່າ ເຂດຫ່າງໄກຊອກຫຼີກ; ການແກ້ໄຂຄວາມຫຼຸດໂຕນກັນ ດ້ານການພັດທະນາ ລະຫວ່າງ ຕົວເມືອງ ກັບຊົນນະບົດ; ການຄຸ້ມຄອງ, ປົກປັກຮັກສາ ແລະ ນໍາໃຊ້ຊັບພະຍາກອນທໍາມະຊາດ ທີ່ຍັງບໍ່ມີຈຸດສຸມ, ບໍ່ຄຸ້ມຄ່າ ແລະ ທໍາລາຍສິ່ງແວດລ້ອມ; ການແກ້ໄຂໜໍ່ແໜງຄວາມບໍ່ສະຫງົບ ແລະ ປະກົດການຫຍໍ້ທໍ້ຕ່າງໆ ໃນສັງຄົມ; ການຍົກສູງສະຕິຊາດ ເອກະລາດ ເປັນເຈົ້າຕົນເອງ, ຄວາມມີສະຕິຕື່ນຕົວເປັນເຈົ້າການ ຂອງສະມາຊິກພັກ, ພະນັກງານ ແລະ ປະຊາຊົນໃນແຂວງວຽງຈັນຈໍານວນບໍ່ໜ້ອຍ ແລະ ບັນຫາອື່ນໆ.
