ພິທີຝຶກອົບຮົມຜ່ານລະບົບທາງໄກ (video conference) ກ່ຽວກັບ ການຄຸ້ມຄອງບໍລິຫານຈັດການກະດານຂ່າວເອເລັກໂຕຼນິກ ຂອງຄະນະໂຄສະນາອົບຮົມບັນດາແຂວງ ທົ່ວປະເທດ ໄດ້ຈັດຂຶ້ນໂດຍຄະນະໂຄສະນາອົບຮົມສູນກາງພັກ, ເລີ່ມແຕ່ວັນທີ 10 – 20 ມິຖຸນາ 2024 ໂດຍການໃຫ້ກຽດເຂົ້າຮ່ວມເປັນປະທານ ແລະ ມີຄວາມເຫັນກ່າວເປີດ ໂດຍ ທ່ານ ນາງ ວິລະວອນ ພັນທະວົງ ຄະນະປະຈຳພັກ, ຮອງຫົວໜ້າຄະນະໂຄສະນາອົບຮົມສູນກາງພັກ, ຜູ້ຊີ້ນຳກົມຂໍ້ມູນຂ່າວສານ ແລະ ຝຶກອົບຮົມ, ການເຂົ້າຮ່ວມຂອງ ທ່ານ ວັນຕຸລາ ຣັກນຸດ ກຳມະການພັກ, ຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ, ມີບັນດາທ່ານ ຕາງໜ້າຄະນະໂຄສະນາອົບຮົມແຂວງ, ຄູອາຈານຂັ້ນສູນກາງ ແລະ ນັກຝຶກອົບຮົມ ຈາກບັນດາແຂວງ ເຂົ້າຮ່ວມຢ່າງເປັນຂະບວນຟົດຟື້ນ.
ຊຸດຝຶກອົບຮົມທີ່ມີຄວາມໝາຍສຳຄັນນີ້ ເປັນການຍົກລະດັບຄວາມຮູ້ ຄວາມສາມາດ ທາງດ້ານເຕັກນິກ (IT) ໃຫ້ແກ່ພະນັກງານທີ່ເຮັດໜ້າທີ່ຄຸ້ມຄອງບໍລິຫານໜ້າກະດານຂ່າວສານເອເລັກໂຕຼນິກ ຢູ່ຂົງເຂດວຽກງານໂຄສະນາອົບຮົມ ໃຫ້ມີຄວາມຊຳນານ ແລະ ມີຄຸນນະພາບດີຂຶ້ນກວ່າເກົ່າ ເປັນຕົ້ນແມ່ນ ການສ້າງ ແລະ ຄຸ້ມຄອງ ລະບົບ (user admin), ການປັບແຕ່ງຮູບພາບ, ການຂຽນຂ່າວລົງເວັບໄຊສ, ການອັບເດດເອກະສານ, ມະຕິ, ຄຳສັ່ງ, ອັບເດດຂໍ້ມູນຂອງເມນູ, ຄໍລຳ້ຕ່າງໆ ແລະ ການເຊື່ອມໂຍງບົດຂ່າວ ໄປຍັງແພັດຟອມອອນລາຍອື່ນໆ ເພື່ອເຂົ້າເຖິງກຸ່ມເປົ້າໝາຍຜູ້ຊົົມໃຊ້ໄດ້ຢ່າງກວ້າງຂວາງ, ວ່ອງໄວ ແລະ ທັນເຫດການ.
ໂອກາດນີ້ ນັກຝຶກອົບຮົມຈາກຄະນະໂຄສະນາອົບຮົມແຂວງວຽງຈັນ ກໍໄດ້ເຂົ້າຮໍ່າຮຽນຕົວຈິງ ໃນວັນທີ 17 – 18 ມິຖຸນາ 2024 ຊຶ່ງໄດ້ມີການແລກປ່ຽນຄຳຄິດຄຳເຫັນ ຮ່ວມກັບ 4 ແຂວງ ທີ່ຢູ່ໃນກຸ່ມຮຽນ, ພ້ອມທັງຖ່າຍທອດເອົາຄວາມຮູ້ ແລະ ປະສົບການອັນລໍ້າຄ່າ ທີ່ຄູອາຈານ ຈາກຄະນະໂຄສະນາອົບຮົມສູນກາງພັກ ໄດ້ຝຶກຝົນຮໍ່າຮຽນໃຫ້ຢ່າງເປັນລະບົບ.
ຊຸດຝຶກອົບຮົມຂໍຮຽກຮ້ອງມາຍັງ ຄະນະຮັບຜິດຊອບຄຸ້ມຄອງບໍລິຫານໜ້າກະດານຂ່າວເອເລັກໂຕຼນິກ ຂອງຄະນະໂຄສະນາອົບຮົມ ແຕ່ລະແຂວງ ຈົ່ງພ້ອມກັນຈັດຕັ້ງປະຕິບັດໜ້າທີ່ຂອງຕົນດ້ວຍຄວາມຮັບຜິດຊອບສູງ ຕໍ່ໜ້າທີ່ການເມືອງທີ່ການຈັດຕັ້ງມອບໝາຍໃຫ້, ເພື່ອຫັນເອົາວຽກງານໂຄສະນາອົບຮົມ ກ້າວໄປສູ່ຄຸນນະພາບໃໝ່ ດ້ວຍລະບົບທີ່ທັນສະໄໝ.
ພິທີຝຶກອົບຮົມ ໄດ້ປິດລົງໃນວັນທີ 20 ມິຖຸນາ 2024 ຢ່າງມີຜົນສຳເລັດ ຕາມຄາດໝາຍທີ່ວາງໄວ້.
