ໃນຕອນເຊົ້າ ຂອງວັນທີ 3 ພຶດສະພາ 2024, ເວລາ 08:00 ໂມງ ຄະນະໂຄສະນາອົບຮົມແຂວງວຽງຈັນ ໄດ້ຈັດພິທີຮຽນສະໜັບສະໜູນໃຫ້ມະຫາຊົນຜູ້ກ້າວໜ້າ ເພື່ອຂະຫຍາຍເຂົ້າເປັນສະມາຊິກພັກປະຊາຊົນປະຕິວັດລາວ ຊຸດທີ I ປະຈຳປີ 2024, ຢູ່ທີ່ຫ້ອງປະຊຸມຂອງພະແນກກະສິກຳ ແລະ ປ່າໄມ້ແຂວງ, ພາຍໃຕ້ການເປັນປະທານຂອງ ສະຫາຍ ຈັນທະວົງ ບົວລະພັນ ຮອງເລຂາໜ່ວຍພັກ, ຮອງຫົວໜ້າຄະນະໂຄສະນາອົບຮົມແຂວງ, ມີມະຫາຊົນຜູ້ກ້າວໜ້າມາຈາກ 8 ພາກສ່ວນ ທັງໝົດ 21 ສະຫາຍ, ຍິງ 9 ສະຫາຍ. ໃນນັ້ນມາຈາກ ຄະນະພັກຮາກຖານພະແນກກະສິກຳ ແລະ ປ່າໄມ້, ຄະນະພັກຮາກຖານພະແນກໂຍທາທິການ ແລະ ຂົນສົ່ງ, ຄະນະພັກຮາກຖານພະແນກພະລັງງານ ແລະ ບໍ່ແຮ່, ຄະນະພັກຮາກຖານພະແນກພາຍໃນ, ຄະນະພັກຮາກຖານຫ້ອງວ່າການແຂວງ, ໜ່ວຍພັກຄະນະກວດກາພັກແຂວງ, ໜ່ວຍພັກທະນາຄານນະໂຍບາຍ ຫ້ອງການປະສານງານແຂວງວຽງຈັນ, ຄະນະພັກຮາກຖານພະແນກເຕັກໂນໂລຊີ ແລະ ການສື່ສານ.
ພິທີດັ່ງກ່າວ ໄດ້ດໍາເນີນໄປດ້ວຍບັນຍາກາດອັນມີເນື້ອໃນ ແລະ ມີຄວາມໝາຍຄວາມສໍາຄັນ ບັນດາເອກະສານທີ່ນໍາໃຊ້ການຮຽນ ປະກອບມີ 13 ຄໍາຖາມ – 13 ຄໍາຕອບ ຕາມຄໍາແນະນໍາຂອງຄະນະໂຄສະນາອົບຮົມສູນກາງພັກ ສະບັບເລກທີ 16/ຄອສພ, ລົງວັນທີ 7 ກໍລະກົດ 2021 ກ່ຽວກັບ ການນໍາໃຊ້ເອກະສານອົບຮົມມະຫາຊົນຜູ້ກ້າວໜ້າ ທີ່ຈະຂະຫຍາຍເຂົ້າເປັນສະມາຊິກພັກປະຊາຊົນປະຕິວັດລາວ.
ຈຸດປະສົງລະດັບຄາດໝາຍ: ເພື່ອເຮັດໃຫ້ມະຫາຊົນຜູ້ທີ່ຈະຂະຫຍາຍເຂົ້າເປັນສະມາຊິກພັກ ຮັບຮູ້ເຂົ້າໃຈກ່ຽວກັບປະຫວັດຄວາມເປັນມາ, ອຸດົມການ ແລະ ທາດແທ້ ຂອງພັກປະຊາຊົນປະຕິວັດລາວ; ເຂົ້າໃຈກ່ຽວກັບ ມາດຕະຖານ, ເງື່ອນໄຂ ມະຫາຊົນຜູ້ທີ່ຈະເຂົ້າເປັນສະມາຊິກພັກ, ຜົນປະໂຫຍດທີ່ສະມາຊິກພັກໄດ້ຮັບ, ເຂົ້າໃຈການປົກປ້ອງບົດບາດ, ກຽດສັກສີຂອງພັກ ເພື່ອເປັນບ່ອນອີງໃຫ້ແກ່ມະຫາຊົນຜູ້ກ້າວໜ້າ ຝຶກຝົນຫຼໍ່ຫຼອມຕົນເອງໃຫ້ມີມາດຕະຖານເງື່ອນໄຂຄົບຖ້ວນ.
ພາຍຫຼັງສໍາເລັດການຮຽນແລ້ວ ສະຫາຍ ຈັນທະວົງ ບົວລະພັນ ຮອງເລຂາໜ່ວຍພັກ, ຮອງຫົວໜ້າຄະນະໂຄສະນາອົບຮົມແຂວງວຽງຈັນ ກໍໄດ້ມອບໃບຢັ້ງຢືນ ໃຫ້ແກ່ມະຫາຊົນຜູ້ກ້າວໜ້າ, ພ້ອມທັງ ໂອ້ລົມຕໍ່ມະຫາຊົນຜູ້ກ້າວໜ້າໃຫ້ເອົາໃຈໃສ່ຝຶກຝົນຫຼໍ່ຫຼອມຕົນເອງໃນທຸກດ້ານ, ພ້ອມກັນນັ້ນ ກໍ່ເອົາໃຈໃສ່ປະຕິບັດບັນດາສິດ, ໜ້າທີ່, ຂໍ້ຫ້າມຕ່າງໆ ຂອງສະມາຊິກພັກ ເພື່ອໃຫ້ຕົນເອງ ມີມາດຕະຖານເງື່ອນໄຂຄົບຖ້ວນ ແລະ ເປັນທີ່ໄວ້ວາງໃຈ ຈາກມະຫາຊົນ ແລະ ຄະນະພັກຂັ້ນເທິງ, ພິທີໄດ້ປິດລົງຢ່າງເປັນທາງການ ໃນເວລາ 11: 30 ໂມງ ຂອງວັນດຽວກັນ.
