ຕອນເຊົ້າວັນທີ 20 ສິງຫາ 2025 ເວລາ 8:00 ໂມງ ທີ່ຫ້ອງປະຊຸມກອງບັນຊາການທະຫານແຂວງວຽງຈັນ ຄະນະໂຄສະນາອົບຮົມແຂວງວຽງຈັນ ສົມທົບກັບແນວລາວສ້າງຊາດແຂວງ ແລະ ຫ້ອງວ່າການແຂວງ ຈັດພິທີປາຖະກະຖາ ວັນສໍາຄັນທາງປະຫວັດສາດ ຂອງພັກ, ຂອງຊາດ ພິທີໃນຄັ້ງນີ້ໄດ້ດໍາເນີນເປັນ 2 ວາລະ ຄື: ວາລະທີ 1: ຮັບຟັງການປາຖະກະຖາ ວັນສ້າງຕັ້ງ ແນວລາວສ້າງຊາດ ຄົບຮອບ 75 ປີ; ວັນສື່ມວນຊົນ ແລະ ການພິມຈໍາໜ່າຍ ຄົບຮອບ 75 ປີ; ວັນຢຶດອໍານາດ ຄົບຮອບ 80 ປີ ແລະ ຄົບຮອບ 50 ປີ; ວັນລັດຖະທໍາມະນູນ ຄົບຮອບ 34 ປີ; ວັນສ້າງຕັ້ງແຂວງວຽງຈັນ ຄົບຮອບ 44 ປີ ໃຫ້ກຽດເປັນປະທານ ແລະ ຂຶ້ນປາຖະກະຖາ ໂດຍທ່ານ ພູທະນູເພັດ ໄຊສົມບັດ ຮອງເລຂາພັກແຂວງ, ຮອງເຈົ້າແຂວງວຽງຈັນ ມີບັນດາທ່ານ ຄະນະປະຈໍາພັກແຂວງ, ກໍາມະການພັກແຂວງ, ອາດີດການນໍາຂອງແຂວງ, ເລຂາຄະນະພັກຮາກຖານ, ເລຂາໜ່ວຍພັກ, ນາຍ ແລະ ພົນທະຫານ, ນາຍ ແລະ ພົນຕໍາຫຼວດ, ພະນັກງານຫຼັກແຫຼ່ງ ຂອງບັນດາພະແນກການ, ອົງການ, ກົມກອງອ້ອມຂ້າງແຂວງ ເຂົ້າຮ່ວມທັງໝົດ 154 ທ່ານ; ຍິງ 45 ທ່ານ.
ໃນພິທີດັ່ງກ່າວ ດໍາເນີນໄປດ້ວຍບັນຍາກາດ ອັນມີເນື້ອໃນ ແລະ ມີຄວາມໝາຍຄວາມສໍາຄັນ ທາງປະຫວັດສາດ ທ່ານໄດ້ຍົກໃຫ້ເຫັນເຖິງການກໍາເນີດ ແລະ ຜົນງານທີ່ພົ້ນເດັ່ນ ຂອງແນວລາວສ້າງຊາດ ໃນການປະຕິບັດນະໂຍບາຍສາມັກຄີລະຫວ່າງເຜົ່າ, ຊັ້ນຄົນ, ສາສະໜາ ແລະ ເພດ-ໄວ, ມູນເຊື້ອການເຕີບໃຫຍ່ຂະຫຍາຍຕົວ ຂອງວຽກງານສື່ມວນຊົນ ແລະ ການພິມຈໍາໜ່າຍ ທີ່ໄດ້ຮັບການພັດທະນາເປັນກ້າວໆ ເຊິ່ງໄດ້ກາຍເປັນເຄື່ອງມືອັນແຫຼມຄົມ ຂອງພັກ ໃນການໂຄສະນາເຜີຍແຜ່ ແລະ ສະໜອງດ້ານຂໍ້ມູນຂ່າວສານ ກໍ່ຄືເຫດການສໍາຄັນຕ່າງໆ ຂອງພັກ, ຂອງຊາດ ໃຫ້ແກ່ສັງຄົມ, ມູນເຊື້ອ ແລະ ປະຫວັດຄວາມເປັນມາ ຂອງການຢຶດອໍານາດ ທັງສອງໄລຍະ ເຊິ່ງເປັນເຫດການປະຫວັດສາດຂອງຊາດລາວເຮົາ ທີ່ໄດ້ສະແດງໃຫ້ເຫັນການຕໍ່ສູ້ ຢ່າງພິລະອາດຫານ ຂອງປະຊາຊົນລາວບັນດາເຜົ່າ, ວັນທີ 23 ສິງຫາ ແມ່ນວັນມະຫາສາມັກຄີ ແມ່ນວັນແຫ່ງໄຊຊະນະ ຂອງແນວທາງປະຕິວັດອັນຖືກຕ້ອງ ແລະ ການນໍາພາອັນສະຫຼາດສ່ອງໃສຂອງພັກ ຍົກໃຫ້ເຫັນຄວາມໝາຍຄວາມສໍາຄັນ ຂອງລັດຖະທໍາມະນູນ ພ້ອມທັງຜົນງານທີ່ພົ້ນເດັ່ນຫຼາຍຢ່າງໃນການປະຕິບັດລັດຖະທໍາມະນູນ ຕະຫຼອດໄລຍະ 34 ປີ ແລະ ປະຫວັດຄວາມເປັນມາ ຂອງແຂວງວຽງຈັນ ຕັ້ງແຕ່ອາດີດຈົນເຖິງປັດຈຸບັນ. ໃນຕອນທ້າຍຂອງພິທີປາຖະກະຖາ ທ່ານຍັງໄດ້ຮຽກຮ້ອງໃຫ້ ເສີມຂະຫຍາຍມູນເຊື້ອ ຂອງວັນສຳຄັນຕ່າງໆ ເຂົ້າໃນການຈັດຕັ້ງປະຕິບັດວຽກງານຢູ່ໃນຂົງເຂດຄວາມຮັບຜິດຊອບຂອງຕົນ.
ວາລະທີ 2: ຫຼັງຈາກຈົບພິທີປາຖະກະຖາແລ້ວ ກໍໄດ້ມີການປະດັບຫຼຽນກາລະນຶກ 70 ປີ ຂອງພັກ ປະຊາຊົນປະຕິວັດລາວ ໃຫ້ແກ່ພະນັກງານຫຼັກແຫຼ່ງ ແລະ ພະນັກງານອາວຸໂສບໍານານ ປະດັບໂດຍ ທ່ານ ພູທະນູເພັດ ໄຊສົມບັດ ຮອງເລຂາພັກແຂວງ, ຮອງເຈົ້າແຂວງວຽງຈັນ ; ພິທີດັ່ງກ່າວ ໄດ້ປິດລົງດ້ວຍຜົນສໍາເລັດຢ່າງຈົບງາມ ເວລາ 12:00 ໂມງ ຂອງວັນດຽວກັນ.
