ພິທີໄດ້ຈັດຂຶ້ນໃນວັນທີ 21 ພະຈິກ 2024 ທີ່ສະໂມສອນຫ້ອງວ່າການແຂວງ, ໃຫ້ກຽດເຂົ້າຮ່ວມເປັນປະທານໂດຍ ທ່ານ ທອງສະຫວັນ ວົງສໍາພັນ ຮອງເລຂາພັກແຂວງ, ຜູ້ຊີ້ນໍາວຽກພັກ-ພະນັກງານ ແຂວງວຽງຈັນ, ມີບັນດາພະແນກການ, ພະນັກງານທີ່ຖືກຍົກຍ້າຍ ພ້ອມດ້ວຍຄະນະພັກ-ຄະນະນຳ ເມືອງແກ້ວອຸດົມ ເຂົ້າຮ່ວມ.
ທ່ານ ກຸຍບາ ແກ້ວມະນີ ຮອງຫົວໜ້າຂະແໜງພັກ, ຄະນະຈັດຕັ້ງແຂວງ ໄດ້ຜ່ານ ຂໍ້ຕົກລົງຂອງທ່ານເຈົ້າແຂວງວຽງຈັນ ສະບັບເລກທີ 2700/ຈຂ.ວຈ, ລົງວັນທີ 15 ພະຈິກ 2024 ວ່າດ້ວຍ ການຍົກຍ້າຍພະນັກງານ ໄປຮັບໜ້າທີ່ໃໝ່ ເຊິ່ງເຫັນດີຍົກຍ້າຍ ທ່ານ ຈັນທະວົງ ບົວລະພັນ ຮອງຄະນະໂຄສະນາອົບຮົມແຂວງ ໄປຮັບໜ້າທີ່ໃໝ່ ຢູ່ເມືອງແກ້ວອຸດົມ ແລະ ມະຕິຕົກລົງ ຂອງຄະນະປະຈໍາພັກແຂວງ ສະບັບເລກທີ 306/ຄປພ.ວຈ, ລົງວັນທີ 15 ພະຈິກ 2024 ວ່າດ້ວຍ ບົ່ງຕົວແຕ່ງຕັ້ງຮອງເລຂາພັກເມືອງແກ້ວອຸດົມ, ຄະນະປະຈໍາພັກແຂວງວຽງຈັນ ຕົກລົງເຫັນດີບົ່ງຕົວແຕ່ງຕັ້ງ ທ່ານ ຈັນທະວົງ ບົວລະພັນ ເປັນຮອງເລຂາພັກເມືອງແກ້ວອຸດົມ.
ທ່ານ ທອງສະຫວັນ ວົງສໍາພັນ ຮອງເລຂາພັກແຂວງ, ຜູ້ຊີ້ນໍາວຽກພັກ-ພະນັກງານແຂວງວຽງຈັນ ໄດ້ກ່າວວ່າ: ການປັບປຸງ, ຍົກຍ້າຍ, ສັບຊ້ອນໜ້າທີ່ວຽກງານ ແມ່ນຖືກົດເກນປົກກະຕິແຫ່ງການຄົງຕົວ ແລະ ຂະຫຍາຍຕົວຂອງພັກເຮົາ, ແນໃສ່ປັບປຸງກົງຈັກການຈັດຕັ້ງພັກ ແລະ ອຳນາດບໍລິຫານລັດ ຢູ່ແຕ່ລະຂົງ ເຂດ, ຂະແໜງການ ແລະ ທ້ອງຖິ່ນ ໃຫ້ມີຄວາມເຂັ້ມແຂງ ໜັກແໜ້ນ, ຮູ້ນຳພາ-ຊີ້ນຳຮອບດ້ານ ໄປຕາມ 5 ຫຼັກການ 3 ທິດນຳຂອງພັກ ວາງອອກ; ສິ່ງທີ່ສຳຄັນອີກບັນຫາໜຶ່ງ ທີ່ຕ້ອງໄດ້ຄຳນຶງເຖິງໃນການປັບປຸງ, ສັບຊ້ອນໃນຄັ້ງນີ້ ກໍຖືເປັນການຈັດວາງບຸກຄະລາກອນ ເພື່ອຮັບຮອງໃຫ້ແກ່ກອງປະຊຸມໃຫຍ່ 3 ຂັ້ນ ຕາມມາດຖານເງື່ອນໄຂທີ່ກຳນົດໄວ້.
ທ່ານ ຈັນທະວົງ ບົວລະພັນ ຮອງເລຂາໜ່ວຍພັກ, ຮອງຫົວໜ້າຄະນະໂຄສະນາອົບຮົມແຂວງ ທ່ານໄດ້ຂຶ້ນຮັບໜ້າທີ່ ແລະ ຄໍາໂອວາດ ກ່ອນອື່ນໝົດ ທ່ານໄດ້ສະແດງຄວາມຮູ້ສຶກເປັນກຽດ ແລະ ພາກພູມໃຈເປັນຢ່າງຍິ່ງ ທີ່ຄະນະພັກຂັ້ນເທິງ ໄດ້ໃຫ້ຄວາມເຊື່ອໝັ້ນຄວາມໄວ້ເນື້ອເຊື່ອໃຈ ແລະ ໄດ້ມອບໝາຍໜ້າທີ່ອັນສໍາຄັນ, ສູງສົ່ງ ແລະ ມີກຽດຂອງພັກ-ລັດ, ຂໍສະແດງຄວາມຂອບໃຈ ແລະ ຮູ້ບຸນຄຸນຢ່າງສູງ ມາຍັງຄະນະພັກ, ການຈັດຕັ້ງຂັ້ນເທິງ ແລະ ພາກສ່ວນກ່ຽວຂ້ອງ ທີ່ໄດ້ອູ້ມ ຊູຊ່ວຍເຫຼືອ ໃຫ້ການສະໜັບສະໜູນ ແລະ ກໍ່ສ້າງເອົາຂ້າພະເຈົ້າ ດ້ວຍຄວາມເປັນຫ່ວງເປັນໄຍ ອົບຮົມບົ່ມສອນ ໃຫ້ກາຍ ເປັນພະນັກງານຜູ້ສືບທອດທີ່ດີຕະຫຼອດມາ ຈົນເຮັດໃຫ້ປະສົບຜົນສໍາເລັດໃນການປະຕິບັດໜ້າທີ່ການເມືອງແຕ່ລະໄລຍະ ຂໍຮັບເອົາໜ້າທີ່ອັນມີກຽດ ແລະ ສູງສົ່ງນີ້ ດ້ວຍຄວາມຈິງໃຈ ແລະ ຄວາມຮັບຜິດຊອບສູງ ມານະທີ່ນີ້. ແລະ ພ້ອມຈະສຸມທຸກສະຕິປັນຍາເຫື່ອແຮງ, ຄວາມຮູ້ຄວາມສາມາດ ເຂົ້າໃນການຈັດຕັ້ງປະຕິບັດວຽກງານໃຫ້ມີປະສິດທິຜົນສູງ ພ້ອມນັ້ນ ທ່ານກໍ່ຍັງໄດ້ຢັ້ງຢືນຕໍ່ຄໍາເຫັນໂອ້ລົມຕໍ່ຄະນະພັກຂັ້ນເທິງວ່າ ທຸກຄໍາເຫັນໂອ້ລົມ ລ້ວນແລ້ວແຕ່ເປັນບົດຮຽນ ແລະ ເປັນບ່ອນອີງທີ່ສໍາຄັນໃນການເຄື່ອນໄຫວຈັດຕັ້ງປະຕິບັດວຽກງານໃນຕໍ່ໜ້າໃຫ້ມີຜົນສໍາເລັດຍິ່ງຂິຶ້ນ.
– ຂຽນຂ່າວ: ນາງ ວິລຸດ ວົງໄຊ
– ບັນນາທິການ: ທ່ານ ຈັນທະວົງ ບົວລະພັນ
– ຮູບພາບ: ນັກຂ່າວ ຖວທ ແຂວງວຽງຈັນ
