ໃນຕອນເຊົ້າຂອງວັນທີ 27 ສິງຫາ 2024 ເວລາ 8:00 ໂມງ ຢູ່ທີ່ສະໂມສອນຫ້ອງວ່າການແຂວງ ໄດ້ເປີດຊຸດຝຶກອົບຮົມຄວາມຮູ້ພື້ນຖານວຽກງານໂຄສະນາປາຖະກະຖາ ໃຫ້ແກ່ພະນັກງານຫຼັກແຫຼ່ງຂອງແຂວງວຽງຈັນ ປະຈຳປີ 2024 ໂດຍພາຍໃຕ້ການເປັນປະທານຂອງ ສະຫາຍ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງວຽງຈັນ ແລະ ການເຂົ້າຮ່ວມຂອງ ສະຫາຍ ອານົງສັກ ອິນທະວົງ ກຳມະການພັກ, ຫົວໜ້າກົມໂຄສະນາ, ຄະນະໂຄສະນາອົບຮົມສູນກາງພັກ, ມີ ສະຫາຍ ສີທົນ ແສງພະຈັນ ກຳມະການພັກແຂວງ, ເລຂາໜ່ວຍພັກ, ຫົວໜ້າຄະນະໂຄສະນາອົບຮົມແຂວງ, ບັນດາຫົວໜ້າ-ຮອງຫົວໜ້າ ພະແນກການອ້ອມຂ້າງແຂວງ ແລະ ຫົວໜ້າ-ຮອງຫົວໜ້າ ຄະນະໂຄສະນາອົບຮົມ 11 ເມືອງ ພ້ອມດ້ວຍພະນັກ ງານພາຍໃນຄະນະໂຄສະນາອົບແຂວງ ເຂົ້າຮ່ວມທັງໝົດ 63 ທ່ານ, ຍິງ 19 ທ່ານ.
ຊຸດຝຶກອົບຮົມໃນຄັ້ງນີ້ ແມ່ນເພື່ອປັບປຸງລະດັບຄວາມຮູ້ ຄວາມສາມາດ ທາງດ້ານວຽກງານໂຄສະນາປາຖະກະຖາ ຂອງພະນັກງານທີ່ເຮັດໜ້າທີ່ເປັນເສນາທິການໃຫ້ແກ່ຄະນະນໍາຂອງພະແນກການ-ກົມກອງອ້ອມຂ້າງແຂວງ ແລະ ການນໍາບັນດາເມືອງ ໄດ້ມີຄວາມຮັບຮູ້ເຂົ້າໃຈເລິກເຊິ່ງ, ທັນຍຸກ, ທັນເຫດການ ແລະ ມີເນື້ອໃນແທດເໝາະກັບສະພາບການປັດຈຸບັນ. ຊຶ່ງໄດ້ນຳໃຊ້ເອກະສານ 5 ບົດ ໃນການຄົ້ນຄວ້າຮໍ່າຮຽນໃຫ້ແກ່ນັກຝຶກອົບຮົມ ຄື: ບັນຫາພື້ນຖານວຽກງານໂຄສະນາ, ຝຶກຝົນຄວາມຮູ້ຄວາມສາມາດໃນການຂຽນເອກະສານ, ຄຸນລັກສະນະ ແລະ ສິລະປະໃນການປາກເວົ້າ, ໂຄສະນາຜ່ານສື່, ບັນດານິຕິກຳ ແລະ ບາງບົດຮຽນໃນການເຄື່ອນໄຫວໂຄສະນາປາຖະກະຖາ, ໂຄສະນາເຄື່ອນທີ່ ແລະ ຜ່ານສື່.
ຊຸດຝຶກອົບຮົມຄັ້ງນີ້ ດໍາເນີນເປັນເວລາ 2 ວັນເຄິ່ງ, ເຊິ່ງນັກສຳມະນາກອນ ໄດ້ເອົາໃຈໃສ່ຄົ້ນຄວ້າປຶກສາຫາລືບົດຮຽນດ້ວຍຄວາມຮັບຜິດຊອບສູງ, ໄດ້ມີການຈັດແບ່ງກຸ່ມຄົ້ນຄວ້າ, ກຳນົດຫົວຂໍ້ ແລະ ເຮັດທົດລອງໃຫ້ແຕ່ລະກຸ່ມຂຶ້ນປາຖະກະຖາ ແລະ ເປັນຈັດຕັ້ງພິທີ (ຕາມຫົວຂໍ້ທີ່ຄະນະຮັບຜິດຊອບກຳນົດໃຫ້) ພ້ອມທັງສ້າງກິດຈະກຳຖາມ-ຕອບ, ຍົກບັນຫາມາແລກປ່ຽນບົດຮຽນນຳກັນ.
ໃນໂອກາດທີ່ມີຄວາມໝາຍສຳຄັນ ຍັງໄດ້ມອບໃບຢັ້ງຢືນໃຫ້ກັບນັກຝຶກອົບຮົມ ທຸກໆສະຫາຍ ຊຶ່ງໃຫ້ກຽດມອບໂດຍ ສະຫາຍ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງວຽງຈັນ ພ້ອມນີ້ ສະຫາຍ ຍັງໄດ້ໂອ້ລົມ, ມີທິດຊີ້ນຳ ຮຽກຮ້ອງໃຫ້ພະນັກງານຫຼັກແຫຼ່ງຂອງແຂວງ ຈົ່ງຍົກສູງຄວາມຮັບຜິດຊອບຕໍ່ວຽກງານໂຄສະນາປາຖະກະຖາ, ກຳແໜ້ນດ້ານເນື້ອໃນເອກະສານຕ່າງໆ ແລະ ນໍາໄປໝູນໃຊ້ໃນເຂົ້າໃນວຽກງານຕົວຈິງ ຢູ່ອົງການ, ກົມກອງ ແລະ ທ້ອງຖິ່ນຂອງຕົນ ເພື່ອປັບປຸງແບບແຜນວິທີການເຮັດວຽກໃຫ້ດີຂຶ້ນເປັນກ້າວໆ. ຊຸດຝຶກອົບຮົມໄດ້ສໍາເລັດລົງໃນ ວັນທີ 29 ສິງຫາ 2024 ເວລາ 12:00 ໂມງ ທີ່ສະໂມສອນຫ້ອງວ່າການແຂວງ.
