ກອງປະຊຸມຄົບຄະນະບໍລິຫານງານພັກແຂວງວຽງຈັນ ຄັ້ງທີ 13 ສະໄໝທີ VI ໄດ້ດຳເນີນເປັນເວລາ 1 ວັນເຄິ່ງ (14 – 15 ພະຈິກ 2024) ພາຍໃຕ້ການນຳພາດຳເນີນກອງປະຊຸມຂອງ ສະຫາຍ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງວຽງຈັນ; ຜ່ານການສະຫຼຸບລາຍງານ, ການຄົ້ນຄວ້າປະກອບຄຳຄິດຄຳເຫັນ ຂອງບັນດາສະຫາຍຄະນະບໍລິຫານງານພັກແຂວງ ແລະ ຜູ້ເຂົ້າຮ່ວມກອງປະຊຸມ ໄດ້ຢັ້ງຢືນເຖິງຜົນສຳເລັດແຫ່ງການນຳພາ-ຊີ້ນຳ ວຽກງານຮອບດ້ານຂອງແຂວງ ໃນ 9 ເດືອນ 2024 ຜ່ານມາ ຊຶ່ງສະແດງອອກ:
ສະພາບເສດຖະກິດຂອງແຂວງວຽງຈັນ ຍັງມີທ່າອ່ຽງຂະຫຍາຍຕົວດີຂຶ້ນ, ລວມຍອດຜະລິດຕະພັນພາຍໃນ (GDP) ຂອງແຂວງ ບັນລຸ 4.9 %, ເທົ່າກັບ 90.74 % ຂອງແຜນການ (ແຜນ 5.4 %), ຄິດເປັນມູນຄ່າ 10,312 ຕື້ກີບ, ສະເລ່ຍຕໍ່ຫົວຄົນ ເທົ່າກັບ 21.06 ລ້ານກີບ, ໃນນີ້: ຂະແໜງກະສິກໍາ ຂະຫຍາຍຕົວ 4 % ກວມເອົາ 34.91 %, ຂະແໜງອຸດສາຫະກໍາ ຂະຫຍາຍຕົວ 4.9 %, ກວມເອົາ 33.32 %, ຂະແໜງບໍລິການ ຂະຫຍາຍຕົວ 5.9 %, ກວມເອົາ 29.54 % ແລະ ພາສີ-ອາກອນ ຂະຫຍາຍຕົວ 0.8 %, ກວມເອົາ 2.23 %.
ການປັບປຸງບູລະນະພື້ນຖານໂຄງລ່າງຂອງແຂວງ ແລະ ບັນດາເມືອງ ໄດ້ມີການພັດທະນາຢ່າງຕໍ່ເນື່ອງ ເປັນຕົ້ນ ໄດ້ປະກາດຮັບຮອງຈຸດສຸມຜາສັງ (ເມືອງເຟືອງ) ເປັນຕົວຕົວເມືອງນ້ອຍໃນຊົນນະບົດຢ່າງເປັນທາງການໃນວັນທີ 5 ມັງກອນ 2024; ປະກາດເປີດດ່ານສາກົນ ບ້ານວັງ ຢ່າງເປັນທາງການ ໃນວັນທີ 15 ຕຸລາ 2024 ແລະ ກຽມພ້ອມປະກາດຮັບຮອງຈຸດສຸມກຸ່ມບ້ານ ນາເລົ່າ-ຫຼັກ 52 (ເມືອງໂພນໂຮງ) ເປັນຕົວເມືອງນ້ອຍ ໃນທ້າຍປີ 2024 ນີ້. ຊຸກຍູ້ການສ້າງເສດຖະກິດເອກະລາດເປັນເຈົ້າຕົນເອງ ໄລຍະໃໝ່ ຕາມມະຕິ 04 / ກມສພ ໃຫ້ປະກົດຜົນເປັນຈິງ, ຊຸກຍູ້ຫົວໜ່ວຍທຸລະກິດ ຂະໜາດນ້ອຍ, ຂະໜາດກາງ ແລະ ຫົວໜ່ວຍຄອບຄົວຂອງປະຊາຊົນ ໃນການຜະລິດພືດກະສິກຳ ເຊັ່ນ: ກ້ວຍ, ມັນຕົ້ນ, ໝາກກ້ຽງ, ຖົ່ວລຽນ, ໝາກເງາະ, ນໍ້າຢາງພາລາ ໃນທົ່ວແຂວງ ຈຳໜ່າຍໄດ້ 1,212.71 ຕື້ກີບ, ການລ້ຽງສັດ ຈຳໜ່າຍໄດ້ 248.72 ຕື້ກີບ; ຊຸກຍູ້ການທ່ອງທ່ຽວແບບປະຊາຊົນມີສ່ວນຮ່ວມ ສ້າງລາຍຮັບທົ່ວສັງຄົມ ໄດ້ 707 ຕື້ກີບ.
ໃນຕອນທ້າຍກອງປະຊຸມ ສະຫາຍ ຄຳພັນ ສິດທິດໍາພາ ກຳມະການສູນກາງພັກ, ເລຂາພັກແຂວງວຽງຈັນ ໄດ້ໃຫ້ກຽດໂອ້ລົມ ແລະ ເນັ້ນໜັກຕື່ມບາງວຽກສຳຄັນ ດັ່ງນີ້:
-
ພວກເຮົາຍັງຈະຕ້ອງໄດ້ເພີ່ມທະວີນຳພາຄົ້ນຄວ້າເຊື່ອມຊຶມກຳແໜ້ນ ມະຕິ, ຄໍາສັ່ງ, ລະບຽບກົດໝາຍ ໃຫ້ເລິກເຊິ່ງກວ່າເກົ່າ, ພ້ອມທັງຈັດຕັ້ງປະຕິບັດໃຫ້ແທດເໝາະກັບສະພາບຕົວຈິງ ຢ່າງມີຫົວຄິດປະດິດສ້າງ, ກ້າເຮັດ-ກ້າຮັບຜິດຊອບ, ສູ້ຊົນແກ້ໄຂຄວາມຫຍຸ້ງຍາກ ໂດຍບໍ່ຖິ້ມຄວາມຮັບ ຜິດຊອບໃຫ້ກັນ, ອັນໃດແກ້ໄຂໄດ້ຕ້ອງແກ້ໃຫ້ຂາດຕົວ, ອັນໃດຕິດພັນໃຫ້ປະສານສົມທົບ ແລະ ຊ່ວຍກັນແກ້ໄຂ ຕາມຄວາມເປັນຈິງຢ່າງຮອບຄອບ, ສອດຄ່ອງ ຕາມມະຕິ, ຄໍາສັ່ງ ແລະ ລະບຽບກົດໝາຍ.
ພ້ອມນີ້ ຕ້ອງເພີ່ມທະວີການຕິດຕາມກວດກາ ເປັນປະຈຳ, ຜູ້ເຮັດດີມີຜົນງານກໍຕ້ອງຍ້ອງຍໍສັນລະເສີນ ແລະ ມອບໝາຍວຽກທີ່ສໍາຄັນໃຫ້; ຜູ້ຂາດຄວາມຮັບຜິດຊອບ, ເຮັດຜິດ ກໍຕ້ອງມີການແກ້ໄຂຂາດຕົວ ເພື່ອນໍາເອົາຜົນປະໂຫຍດຕົວຈິງ ມາໃຫ້ປະຊາຊົນ ເຮັດໃຫ້ກົມກອງ, ທ້ອງຖິ່ນເຮົາ ມີການປ່ຽນແປງໃໝ່ດີຂຶ້ນກວ່າເກົ່າ.
-
ຂະບວນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງ ບໍ່ທັນເຂົ້າສູ່ລວງເລິກ, ບໍ່ທັນສຸມໃສ່ແກ້ຮາກເຫງົ້າຂອງບັນຫາ, ບວກໃສ່ກັບການຕິດຕາມກວດກາ, ບັນຊາ-ຊີ້ນຳຂອງບາງຂະແໜງການ ກໍຍັງເປັນອັນລວມໆ, ບໍ່ທັນມີແຜນການ, ໂຄງການແທດຕົວຈິງເທົ່າທີ່ຄວນ, ຈຶ່ງເຮັດໃຫ້ໝາກຜົນໄດ້ຮັບບໍ່ທັນແຈ້ງ, ການແກ້ໄຂບໍ່ທັນຫັນປ່ຽນຢ່າງຈະແຈ້ງແທ້.
-
ການຜັນຂະຫຍາຍດ້ວຍກົນໄກສົ່ງເສີມ ແລະ ວິທີການຕົວຈິງ ໃນການຜະລິດສິນຄ້າ ຍັງບໍ່ທັນໂລ່ງລ່ຽນ ແລະ ບໍ່ທັນກຳນົດການແບ່ງງານ, ແບ່ງຄວາມຮັບຜິດຊອບ ຈະແຈ້ງແທ້. ການຊີ້ນຳບັນຊາແນວໃດ ທີ່ຈະໃຫ້ຜູ້ຊີ້ນຳບັນຊາ ເປັນຜູ້ຕີຈັງຫວະໃຫ້ເກີດຜົນເປັນຈິງ ຍັງຊັກຊ້າ.
-
ຂອດຂັ້ນຂອງພວກເຮົາ ຍັງບໍ່ທັນວ່ອງໄວ, ຫຼົບໄປຫຼົບມາ, ຂາດແຮງດຶງດູດການລົງທຶນ, ພວກເຮົາຍັງບໍ່ທັນຈັບໂອກາດດີໆ ຈາກສະພາບການ, ເງື່ອນໄຂທ່າແຮງທີ່ມີ ເພື່ອເປີດຮັບແຫຼ່ງທຶນ ຕາມເງື່ອນໄຂ 4 ສຸມ 2 ຮັບ 1 ເອື້ອອຳນວຍ.
-
ການຄຸ້ມຄອງລາຍຮັບ-ລາຍຈ່າຍງົບປະມານ ເຖິງວ່າໄດ້ເອົາໃຈໃສ່ ແລະ ມີຄວາມພະຍາຍາມສູງ, ແຕ່ກໍຍັງມີການຮົ່ວໄຫຼ, ການຫັນເປັນທັນສະໄໝທາງດ້ານການເງິນ ຍັງເຮັດບໍ່ທັນໄດ້ເທົ່າທີ່ຄວນ ແລະ ຊັກຊ້າ; ການນຳພາຂະຫຍາຍຖານເກັບລາຍຮັບ ຍັງເຮັດບໍ່ທັນດີ.
-
ຊຸກຍູ້ການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ທົ່ວແຂວງ ດ້ວຍການຈັດຕັ້ງເຊື່ອມຊຶມເອກະສານກ່ອນດຳເນີນຊີວິດການເມືອງທ້າຍສະໄໝ ຕິດພັນກັບກອງປະຊຸມໃຫຍ່ຂອງຄະນະພັກແຕ່ລະຂັ້ນ ເພື່ອໃຫ້ຮັບປະກັນທາງດ້ານຂະບວນການໃຫ້ເຂົ້າສູ່ລວງເລິກ, ມີເນື້ອໃນຖືກຕ້ອງສອດຄ່ອງ ແລະ ຄັດເລືອກເອົາບຸກຄະລາກອນ ທີ່ມີມາດຖານເງື່ອນໄຂຕາມທີ່ກຳນົດໄວ້, ສືບຕໍ່ຊຸກຍູ້ການຈັດຕັ້ງເຊື່ອມຊຶມຜັນຂະຫຍາຍມະຕິກອງປະຊຸມໃຫຍ່ ແລະ ແຜນພັດທະນາເສດຖະກິດ-ສັງຄົມ ໜ່ວຍພັກບ້ານ ທີ່ໄດ້ເປີດກອງປະຊຸມໃຫຍ່ສຳເລັດ ເພື່ອຜັນຂະຫຍາຍເປັນແຜນງານ, ແຜນການ, ໂຄງການລະອຽດເຂົ້າໃນວຽກງານຕົວຈິງຢ່າງມີປະສິດທິພາບ (ບໍ່ໃຫ້ເປັນມະຕິ, ແຜນການວາງໄວ້ລ້າ), ໄປພ້ອມນີ້ ກໍຈະໄດ້ພ້ອມກັນສ້າງຜົນງານຂໍ່ານັບຮັບຕ້ອນ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ, ວັນສະຖາປານາ ສປປ ລາວ ຄົບຮອບ 50 ປີ ແລະ ວັນຄ້າຍວັນເກີດຂອງ ປະທານ ໄກສອນ ພົມວິຫານ ຄົບຮອບ 105 ທີ່ຈະມາເຖິງ ໃຫ້ເປັນຂະບວນການຟົດຟື້ນກວ້າງຂວາງ; ກອງປະຊຸມໄດ້ປິດລົງ ເວລາ 11:45 ນາທີ ຂອງວັນທີ 15 ພະຈິກ 2024 ຢ່າງມີຜົນສຳເລັດຕາມຄາດໝາຍ.
——————————————-
-ຂຽນຂ່າວ: ເສີດ ຢຳຢວນ
-ບັນນາທິການ: ທ່ານ ຈັນທະວົງ ບົວລະພັນ
-ຮູບພາບຈາກ: ນັກຂ່າວ ຖວທ ແຂວງວຽງຈັນ
