ກອງປະຊຸມຄົບຄະນະບໍລິຫານງານພັກແຂວງວຽງຈັນ ຄັ້ງທີ 13 ສະໄໝທີ VI ໄດ້ໄຂຂຶ້ນໃນວັນທີ 14 ພະຈິກ 2024, ຢູ່ທີ່ສະໂມສອນຫ້ອງວ່າການແຂວງ, ໂດຍການເປັນປະທານຂອງ ສະຫາຍ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ, ມີບັນດາສະຫາຍຮອງເລຂາພັກແຂວງ, ກຳມະການປະຈຳພັກແຂວງ, ກຳມະການພັກແຂວງ, ເລຂາພັກເມືອງ, ເລຂາຄະນະພັກ 2 ກອງບັນຊາການ, ຄະນະພັກຮາກຖານ, ໜ່ວຍພັກຮາກຖານ ເຂົ້າຮ່ວມທັງໝົດ 61 ສະຫາຍ, ຍິງ 7 ສະຫາຍ.
ກອງປະຊຸມ ໄດ້ນຳພາເຜີຍແຜ່ເຊື່ອມຊຶມມະຕິ 8 ສະໄໝທີ XI ຂອງພັກ, ຄຳສັ່ງຂອງຄະນະເລຂາທິການສູນກາງພັກ ສະບັບເລກທີ 173/ຄລສພ ວ່າດ້ວຍ ຄາດຄະເນການແບ່ງຄວາມຮັບຜິດຊອບຂອງຄະນະປະຈຳພັກແຕ່ລະຂັ້ນ, ແຈ້ງການຂອງຄະນະຈັດຕັ້ງສູນກາງພັກ ສະບັບເລກທີ 186/ຈຕສພ. ພ້ອມທັງສະຫຼຸບຕີລາຄາວຽກງານຮອບດ້ານຂອງແຂວງ 9 ເດືອນຜ່ານມາ ແລະ ທິດທາງແຜນການ 3 ເດືອນທ້າຍປີ 2024, ສະຫຼຸບຕີລາຄາວຽກງານກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານ ແລະ ວຽກງານ 3 ສ້າງ, ສະຫຼຸບຜົນງານ 40 ປີ ແຫ່ງການປະຕິບັດແນວທາງປ່ຽນແປງໃໝ່ຮອບດ້ານມີຫຼັກການຂອງພັກ ຢູ່ແຂວງວຽງຈັນ ແລະ ສະຫຼຸບລາຍງານການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ໃນທົ່ວແຂວງ; ນອກຈາກນັ້ນ ບັນດາສະຫາຍຄະນະບໍລິຫານງານພັກແຂວງ ຈະໄດ້ສຸມໃສ່ຄົ້ນຄວ້າແລກປ່ຽນຄຳຄິດຄຳເຫັນ ເພື່ອຖອດຖອດບົດຮຽນ ແລະ ກຳນົດທິດທາງວຽກງານຈຸດສຸມໃນ 3 ເດືອນທ້າຍປີ 2024 ແລະ ຍຸດທະສາດສະເພາະໜ້າ, ຍາວນານ ເພື່ອສືບຕໍ່ແກ້ໄຂບັນຫາເຄັ່ງຮ້ອນຂອງແຂວງ ໃຫ້ບັນລຸຜົນສຳເລັດຕາມຄາດໝາຍ; ກອງປະຊຸມຈະດຳເນີນເປັນເວລາ 2 ວັນເຕັມ (ວັນທີ 14-15 ພະຈິກ 2024).
-ຂຽນຂ່າວ: ເສີດ ຢຳຢວນ
-ບັນນາທິການ: ທ່ານ ຈັນທະວົງ ບົວລະພັນ
-ຮູບພາບຈາກ: ນັກຂ່າວ ຖວທ ແຂວງວຽງຈັນ
