ໃນວັນທີ 12 ທັນວາ 2024 ອະນຸກຳມະການເນື້ອໃນກອງປະຊຸມໃຫຍ່ 3 ຂັ້ນ ຂອງແຂວງ ໄດ້ເຂົ້າຮ່ວມສົມທົບກັບອະນຸກຳມະການບຸກຄະລາກອນ ຂັ້ນສູນກາງ-ແຂວງ ຊຸກຍູ້ດຳເນີນກອງປະຊຸມທາບທາມເນື້ອໃນ ແລະ ບຸກຄະລາກອນ ຮອບທີ 2 ຂອງຄະນະບໍລິຫານງານພັກເມືອງກາສີ ເພື່ອຫ້າງຫາກະກຽມໃຫ້ແກ່ການດຳເນີນກອງປະຊຸມໃຫຍ່ຜູ້ແທນອົງຄະນະພັກເມືອງກາສີ ຄັ້ງທີ VIII ຊຶ່ງຈະຈັດຂຶ້ນເປັນເມືອງຕົວແບບທຳອິດຂອງແຂວງວຽງຈັນ. ກອງປະຊຸມດັ່ງກ່າວດຳເນີນໄປດ້ວຍຄວາມຮັບຜິດຊອບສູງ ຂອງຄະນະຮັບຜິດຊອບແຕ່ລະຂັ້ນ ກໍຄືບັນດາສະຫາຍໃນຄະນະບໍລິຫານພັກເມືອງ, ຜູ້ແທນສົມບູນ ແລະ ສຳຮອງ ຈຳນວນ 200 ກວ່າ ສະຫາຍ, ຊຶ່ງໄດ້ຮັບຟັງການຜ່ານ ຮ່າງລາຍງານການເມືອງ, ຮ່າງແຜນພັດທະນາເສດຖະກິດ-ສັງຄົມ ຂອງເມືອງ ແລະ ຮ່າງບົດສຳຫຼວດການນຳພາລວມ ຂອງຄະນະບໍລິຫານງານພັກເມືອງ
ໃນໂອກາດທີ່ມີຄວາມໝາຍສຳຄັນນີ້ ທ່ານ ສີທົນ ແສງພະຈັນ ກຳມະການພັກແຂວງ, ຫົວໜ້າຄະນະໂຄສະນາອົບຮົມແຂວງ, ຮອງຫົວໜ້າອະນຸກຳມະການເນື້ອໃນຂອງແຂວງ ໄດ້ມີຄຳເຫັນເນັ້ນໜັກເພີ່ມຕື່ມບາງດ້ານ ເຊັ່ນ: ດ້ານສະຫຼຸບຕີລາຄາ ແລະ ການກຳນົດທິດທາງແຜນການ 5 ປີ ຕໍ່ໜ້າ ຂອງເນື້ອໃນບົດລາຍງານການເມືອງ ແລະ ແຜນພັດທະນາເສດຖະກິດ-ສັງຄົມ ຂອງເມືອງກາສີ ໃຫ້ມີຄວາມສອດຄ່ອງ, ເກາະຫ້ອຍ ໄປຕາມທິດທາງຂອງສູນກາງພັກ ວາງອອກ ເປັນຕົ້ນແມ່ນ ມະຕິ 05 ຄະນະບໍລິຫານງານສູນກາງພັກ ວ່າດ້ວຍ ສືບຕໍ່ຍູ້ແຮງການຜັນຂະຫຍາຍແນວທາງປ່ຽນແປງໃໝ່ ສູ່ລວງເລິກ, ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ໃນການນຳພາຂອງພັກ; ມະຕິ 04 ກົມການເມືອງສູນກາງພັກ ວ່າດ້ວຍ ການສ້າງເສດຖະກິດເອກະລາດເປັນເຈົ້າຕົນເອງ ໃນໄລຍະໃໝ່, ຕ້ອງກຳນົດຍຸດທະສາດການພັດທະນາເສດຖະກິດຕາມທ່າແຮງທີ່ມີຂອງເມືອງ ດ້ານການຜະລິດກະສິກຳເປັນສິນຄ້າຂອງປະຊາຊົນ, ການສ້າງສິນຄ້າ (ODOP) ຕິດພັນກັບການສະໜອງສິນຄ້າຕາມແລວທາງລົດໄຟ ລາວ-ຈີນ, ການຂະຫຍາຍຕາໜ່າງການບໍລິການທ່ອງທ່ຽວ ແບບທຳມະຊາດ; ການຫັນທຸກຂົງເຂດວຽກງານເປັນທັນສະໄໝ ແລະ ໃຫ້ມີການຈັດຝຶກຊ້ອມບາດກ້າວຂັ້ນຕອນ ຂຶ້ນຜ່ານເອກະສານດຳເນີນກອງປະຊຸມໃຫຍ່ ເພື່ອໃຫ້ມີຄວາມໂລ່ງລ່ຽນ, ມີບັນຍາກາດໜັກແໜ້ນ ຕາມທັດສະນະຂອງພັກ.
ກອງປະຊຸມໄດ້ສືບຕໍ່ປ່ອນບັດທາມທາບລົງຄະແນນສຽງ ຮອບທີ 2 ຄັດເລືອກເອົາຄະນະບໍລິຫານງານພັກເມືອງ ແລະ ຄັດເລືອກເປົ້າໝາຍເລຂາ-ຮອງເລຂາ, ຄະນະປະຈຳພັກເມືອງ, ປະທານ-ຮອງປະທານກວດກາພັກເມືອງ ສຳເລັດຕາມຄາດໝາຍ ແລະ ໄດ້ປິດກອງປະຊຸມໃນເວລາ 16:00 ໂມງ ຂອງວັນດຽວກັນ.
