ໃນວັນທີ 4 ທັນວາ 2024 ທີມງານຄະນະໂຄສະນາອົມຮົມແຂວງວຽງຈັນ ສົມທົບກັບຄະນະໂຄສະນາອົບຮົມເມືອງໂພນໂຮງ ລົງເຄື່ອນໄຫວເກັບກໍາຂໍ້ມູນ ຄອບຄົວຕົວແບບກ່ຽວກັບການລ້ຽງງົວ ຢູ່ບ້ານໂພນຫໍ, ເມືອງໂພນໂຮງ, ແຂວງວຽງຈັນ,ນໍາທີມໂດຍ ທ່ານ ນ ມະນີຈັນ ທໍາມະໂຄດ ຄະນະໜ່ວຍພັກ, ຮອງຫົວໜ້າຄະນະໂຄສະນາອົບຮົມແຂວງວຽງຈັນ ໂດຍໄດ້ລົງເກັບຂໍ້ມູນ ຄອບຄົວທ່ານ ພັນທະບູນ ວົງໄຊ ຊຶ່ງແມ່ນໜຶ່ງໃນຄອບຄົວຕົວແບບໃນການສ້າງເສດຖະກິດຄອບຄົວ ຂອງປະຊາຊົນ ບ້ານ ໂພນຫໍ, ເມືອງໂພນໂຮງ, ແຂວງວຽງຈັນ.
ຟາມລ້ຽງງົວແຫ່ງນີ້ໄດ້ກໍ່ຕັ້ງຂຶ້ນມາແຕ່ປີ 2018 ເຊິ່ງມີຊື່ຟາມວ່າ: SV ຟາມ, ມີເນື້ອທີ່ທັງໝົດ 35 ເຮັກຕາ, ໃນນັ້ນ ແບ່ງປູກຫຍ້າ 3 ເຮັກຕາ ແລະ ປູກໝາກພ້າວນໍ້າຫອມ 7 ເຮັກຕາ ມີຈໍານວນ 500 ຕົ້ນ, ອີກ 25 ເຮັກຕາ ແມ່ນເຮັດຟາມງົວ; ໃນເມື່ອກ່ອນ ທ່ານ ພັນທະບຸນ ວົງໄຊ ກໍ່ເປັນພະນັກງານ ແລະ ເພື່ອສ້າງໃຫ້ຄອບຄົວ ຂອງຕົນມີຄວາມອຸດົມ ສົມບູນຂຶ້ນກວ່າເກົ່າ ຈຶ່ງໄດ້ສູ້ຊົນເຮັດອາຊີບເສີມ ໂດຍໝູນໃຊ້ເວລາວ່າງ ເພື່ອລ້ຽງໝູ ແຕ່ກໍ່ບໍ່ປະສົບຜົນສໍາເລັດເທົ່າທີ່ຄວນ, ດັ່ງນັ້ນຈຶ່ງຫັນປ່ຽນມາລ້ຽງງົວ ໂດຍມີການໂຮມທຶນຈາກພີ່ນ້ອງຮ່ວມກັນໄດ້ 2,3 ຕື້, ໃນນັ້ນ ໄດ້ແບ່ງທຶນເປັນສ່ວນ ສ້າງໂຮງເຮືອນໃຫ້ງົວ, ໂຮງເຮືອນເກັບມ້ຽນອາຫານກໍ່ຄືເຟືອງໄວ້ເກືອງົວ, ຊື້ລົດຫຸນໄດ, ລົດໄຖ, ລົດອັດເຟືອງ ແລະ ຊື້ພໍ່ພັນແມ່ນພັນງົວ; ສໍາລັບແນວພັນງົວແມ່ນນໍາເຂົ້າມາຈາກ ປະເທດໃກ້ຄຽງ ເປັນພັນບຼາມັນ; ເບື້ອງຕົ້ນມີງົວ 35 ໂຕ, ປັດຈຸບັນຂະຫຍາຍໄດ້ 113 ໂຕ, ມີພໍ່ພັນ 4 ໂຕ, ແມ່ພັນ 60 ໂຕ;
ທ່ານໄດ້ມີວິທີການບໍາລຸງຮັກສາ ເພື່ອໃຫ້ງົວໃຫຍ່ໄວ ແລະ ສຸຂະພາບດີ ໂດຍຈະມີການອະນາໄມຢູ່ເລື້ອຍໆ ເພື່ອບໍ່ໃຫ້ຄອກມີຄວາມຊຸ່ມຊື້ນ ຫຼີກເວັ້ນບໍ່ໃຫ້ງົວຕິດເຊື້ອພະຍາດ, ຕົ້ນຍາມ ໜາວ ແມ່ນຈະໄດ້ສັກວັກຊີນ ເພື່ອປ້ອງກັນພະຍາດເຕົ້າໂຮມເລືອດ; ຈາກການລ້ຽງງົວດັ່ງກ່າວສາມາດສ້າງລາຍຮັບໄດ້ 80 ລ້ານກວ່າກີບຕໍ່ປີ; ທ່ານ ພັນທະບູນ ເຫັນວ່າ ການລ້ຽງງົວມີຜົນໄດ້ຮັບທີ່ດີຫຼາຍ ສາມາດເຮັດໃຫ້ຄອບຄົວໄດ້ຮັບການພັດທະນາຫຼາຍດ້ານ ຈຶ່ງຕັດສິນໃຈອອກການ ເພື່ອມາສ້າງເສດຖະ ກິດຄອບຄົວ.ແຮງຈູງໃຈທີ່ເຮັດໃຫ້ທ່ານ ພັນທະບູນ ເລືອກໃນອາຊີບນີ້ ກໍ່ຍ້ອນວ່າ ໂດຍສ່ວນຕົວຂອງເພິ່ນແມ່ນ ມີຄວາມມັກຮັກອາຊີບລ້ຽງສັດມາແຕ່ນ້ອຍຢູ່ແລ້ວ ບວກກັບຫ້ອງການທີ່ກ່ຽວຂ້ອງຂັ້ນເມືອງ ໄດ້ຊຸກຍູ້ ແລະ ອໍານວຍຄວາມສະດວກ ຊ່ວຍໃຫ້ການແນະນໍາ ທາງດ້ານວິຊາການ ແລະ ຊອກຮູ້ຮໍ່າຮຽນຈາກອິນເຕີເນັດ ດັ່ງນັ້ນຈຶ່ງເຮັດໃຫ້ທ່ານມີບົດຮຽນ ແລະ ປະສົບການ ເພື່ອນໍາມາໝູນໃຊ້ໃນການລ້ຽງງົວຈົນໄດ້ຮັບຜົນສໍາເລັດ, ປັດຈຸບັນຄອບຄົວຂອງທ່ານ ມີເຮືອນ 2 ຫຼັງ, ມີລົດກະບະ 3 ຄັນ, ລົດຫຸນໄດເພີ່ມອີກ 1 ຄັນ ແລະ ລົດໄຖນາເພີ່ມອີກ 1 ຄັນ.
ທ່ານ ພັນທະບູນ ວົງໄຊ ກໍ່ແມ່ນຜູ້ໜຶ່ງທີ່ໄດ້ເຂົ້າຮ່ວມກຸ່ມສະມາຄົມການລ້ຽງງົວພັນບຼາມັນ ຂອງລາວ ແລະ ທ່ານໄດ້ໃຫ້ຮູ້ອີກວ່າ ຜ່ານມາແມ່ນລ້ຽງເພື່ອຂາຍເປັນພໍ່ພັນແມ່ນພັນ ແຜນໃນຕໍ່ໜ້າຈະຂະຫຍາຍເນື້ອທີ່ປູກຫຍ້າໃຫ້ໄດ້ 8 ເຮັກຕາ ເພື່ອຕອບສະໜອງໃຫ້ພຽງພໍກັບຄວາມຕ້ອງການຂອງງົວ, ຈະຂະຫຍາຍແມ່ພັນງົວໃຫ້ໄດ້ 100 ໂຕ ແລະ ພໍ່ພັນງົວໃຫ້ໄດ້ 10 ໂຕ ເພື່ອເປັນສິນຄ້າສົ່ງອອກຕ່າງປະເທດ. ທ່ານ ພັນທະບູນ ວົງໄຊ ຍັງໄດ້ເຊີນຊວນ ໃຫ້ພໍ່ແມ່ປະຊາຊົນ ຫັນມາລ້ຽງງົວພັນບຼາມັນນີ້ໃຫ້ຫຼາຍຂຶ້ນ ເພື່ອໃຫ້ໄດ້ເປັນສິນຄ້າສົ່ງອອກ ແລະ ອີກຢ່າງໜຶ່ງລາຄາງົວພັນບຼາມັນ ກໍ່ສູງກວ່າລາຄາງົວທໍາມະຊາດບ້ານເຮົາອີກ.
