ວັນທີ 3 ກໍລະກົດ 2025, ເວລາ 08:00 ໂມງ ຄະນະໂຄສະນາອົບຮົມແຂວງວຽງຈັນ ນໍາພາໂດຍ ທ່ານ ຂັນໄຊ ຫລວງຜ່ານ, ຮອງຫົວໜ້າຄະນະໂຄສະນາອົບຮົມແຂວງວຽງຈັນ ພ້ອມດ້ວຍພະນັກງານ 9 ທ່ານ, ຍິງ 5 ທ່ານ ເຂົ້າຮ່ວມກອງປະຊຸມສ່ອງແສງລາຍງານການຈັດຕັ້ງປະຕິບັດວຽກງານເຕັກໂນໂລຊີ- ຂໍ້ມູນຂ່າວສານ (ເວັບໄຊສ) ປະຈຳໄຕມາດ II (4 -5-6) ປີ 2025 ທີ່ຄະນະໂຄສະນາອົບຮົມສູນກາງພັກຈັດຂຶ້ນ (ຜ່ານລະບົບທາງໄກ) ໂດຍການເປັນປະທານ ຂອງ ທ່ານ ວັນຕຸລາ ຣັກນຸດ ກໍາມະການຄະນະພັກ ຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ. ກອງປະຊຸມດໍາເນີນໄປດ້ວຍຈິດໃຈອັນເບິກບານມ່ວນຊື່ນຕໍ່ຜົນສໍາເລັດທີ່ຄະນະໂຄສະນາອົບຮົມສູນກາງພັກ ແລະ ບັນດາແຂວງໃນທົ່ວປະເທດຍາດໄດ້ໃນໄລຍະໄຕມາດ II ຜ່ານມາ. ໂດຍສະເພາະແມ່ນໄດ້ມີການແລກປ່ຽນຄໍາຄິດເຫັນກ່ຽວກັບການປັບປຸງກົງຈັກການຈັດຕັ້ງ ຂອງຄະນະໂຄສະນາອົບຮົມສູນກາງພັກ ແລະ ຄະນະໂສະນາອົບຮົມບັນດາແຂວງໃນທົ່ວປະເທດ, ເປັນຕົ້ນແມ່ນການໂຮມເອົາວຽກງານຈໍານວນໜຶ່ງຂອງກະຊວງຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວມາຂຶ້ນກັບຄະນະໂຄສະນາອົບ ນັບທັງຢູ່ສູນກາງ ແລະ ທ້ອງຖິ່ນໃຫ້ສໍາເລັດຕາມຄາດໝາຍທີ່ວາງໄວ້.
ກອງປະຊຸມຍັງໄດ້ພ້ອມກັນສັງເກດຕີລາຄາບັນດາຈຸດອ່ອນຂໍ້ຄົງຄ້າງ ແລະ ມາດຕະການແກ້ໄຂຕໍ່ກັບການຈັດຕັ້ງປະຕິບັດວຽກງານເຕັກໂນໂລຊີ- ຂໍ້ມູນຂ່າວສານ (ເວັບໄຊສ) ປະຈຳໄຕມາດ II ຜ່ານມາ. ພ້ອມທັງວາງທິດທາງແຜນການເຄື່ອນໄຫວໃນຕໍ່ໜ້າເພື່ອຮັບປະກັນໃຫ້ມີການປະຕິບັດວຽກງານຢ່າງຕໍ່ເນື່ອງໂດຍສະເພາະການໂຄສະນາເຜີຍແຜ່ບັນດາຂໍ້ມູນຂ່າວສານຕ່າງໆ ເປັນຕົ້ນແມ່ນການນຳໃຊ້ເພສເຟສບຸກເພື່ອຊ່ວຍກະຈາຍຂ່າວຈາກເວັບໄຊສຂອງຕົນ ຫຼື ການນຳໃຊ້ເພສຂອງຄະນະໂຄສະນາອົບຮົມແຂວງແຊບັນດາຂ່າວສານການເຄື່ອນໄຫວຂອງຄະນະນຳແຂວງ, ຄະນະນໍາ ຄອຮ.ຂ.
ຕອນທ້າຍ ທ່ານ ວັນຕຸລາ ຣັກນຸດ ຍັງໄດ້ໃຫ້ທິດເພີ່ມເຕີມອີກວ່າ :
- ການເພີ່ມຂໍ້ມູນລົງໃນລະບົບການລົງທະບຽນຂໍ້ມູນອັດຕະໂນມັດແຕ່ລະແຂວງແມ່ນສໍາເລັດແລ້ວຫຼືບໍ?
- ໃນການເຄື່ອນໄຫວວຽກງານເວັບໄຊຂອງບັນດາທ່ານຂອດໃດທີ່ຍັງເຫັນໄດ້ວ່າຍັງເຮັດບໍ່ໄດ້ ຫຼື ຊັກຊ້າ ແມ່ນຄ້າງຢູ່ຈຸດໃດ ຂໍໃຫ້ຮີບຮ້ອນແກ້ໄຂໄປເທື່ອລະກ້າວ.
- ຄະນະຮັບຜິດຊອບແອັດມິນຕ້ອງສັງເກດຕີລາຄາຄືນໃນການຈັດຕັ້ງປະຕິບັດວຽກງານຕົວຈິງໃນແຕ່ລະໄລຍະ ເພື່ອລາຍງານຕໍ່ຜູ້ຊີ້ນໍາ ແລະ ວາງທິດທາງແຜນການແກ້ໄຂໃນຕໍ່ໜ້າໄດ້ຢ່າງທັນການ.
- ສືບຕໍ່ຕິດຕາມ,ກວດກາການເຄື່ອນໄຫວໜ້າເວັບໄຊສຂອງແຂວງຕົນຈຸດໃດທີ່ຍັງຄ້າງແມ່ນປະສານຫາສູນກາງຊ່ວຍແນະນໍາເພື່ອໃຫ້ໜ້າເວັບໄຊສໃຫ້ມີຄວາມອຸດົມສົມບູນຍິ່ງຂື້ນ.
- ທາງດ້ານຄວາມຮັບຜິດຊອບໃນຂອດການປະສານຂອງແອັດມິນແຕ່ລະແຂວງໃນການສົ່ງບົດສະຫຼຸບລາຍງານການເຄື່ອນໄຫວຈັດຕັ້ງປະຕິບັດວຽກງານເວັບໄຊສກໍຄືຜົນງານປະຈໍາເດືອນຂອງແຕ່ລະແຂວງ ເຫັນໄດ້ວ່າມີການຫຼຸດໜ້ອຍລົງບາງແຂວງກໍຍັງຖືເບົາບໍ່ມີການສົ່ງບົດສະຫຼຸບລາຍງານໃຫ້ທາງສູນກາງ ເຊິ່ງມັນກໍສົ່ງຜົນໃຫ້ທາງຄະນະຮັບຜິດຊອບຂອງສູນກາງໃນການຕິດຕາມ, ກວດກາການເຄື່ອນໄຫວທາງດ້ານຕ່າງໆ ບໍ່ເຕັມເມັດເຕັມໜ່ວຍ.
- ໃນການກໍ່ສ້າງພະນັກງານ ໄດ້ຈັດວາງ ແລະ ເລືອກເຟັ້ນກັນລະອຽດແລ້ວບໍ ນັ້ນກໍ່ເພື່ອຮັບປະກັນລັກສະນະຍືນຍົງຖ້າຫາກປ່ຽນຜູ້ຮັບຜິດຊອບເລື້ອຍໆມັນຈະເຮັດໃຫ້ວຽກຢຸດຊະງັດ ສະນັ້ນ ຂໍເນັ້ນໜັກໃຫ້ຄະນະນຳໂຄສະນາອົບຮົມແຂວງຊ່ວຍບຳລຸງກໍ່ສ້າງຢ່າງເລິກເຊິ່ງ ແລະ ແບ່ງໜ້າທີ່ຄວາມຮັບຜິດຊອບໃຫ້ແຕ່ລະສະຫາຍແທດເໝາະກັບຄວາມຮູ້ຄວາມສາມາດ ແລະ ວິຊາສະເພາະຂອງແຕ່ລະສະຫາຍ,
- ຄະນະຮັບຜິດຊອບແອັດມິນຂອງແຕ່ລະແຂວງກໍຂໍໃຫ້ສືບຕໍ່ແລກປ່ຽນຖ່າຍທອດຄວາມຮູ້ໃຫ້ກັນ ແລະ ກັນ ເພື່ອສາມາດເຮັດວຽກປ່ຽນແທນກັນໄດ້ ບໍ່ສະເພາະແຕ່ວ່າແລກປ່ຽນນໍາສູນກາງ ຈະແລກປ່ຽນ ກັບ ບັນດາແຂວງອື່ນໆກໍຍິ່ງເປັນການດີ ເພື່ອແລກປ່ຽນບົດຮຽນ ປະສົບການໃໝ່ໆຮ່ວມກັນເຖິງຈະມີຄວາມຫຍຸ້ງຍາກພວກເຮົາກໍ່ຕ້ອງໄດ້ພ້ອມກັນຊູ້ຊົນເຮັດສໍາເລັດຕາມຄາດໝາຍທີ່ວາງໄວ້.
