ໃນຕອນເຊົ້າ ຂອງວັນທີ 19 ທັນວາ 2024 ທີ່ຜ່ານມາ, ໄດ້ເຂົ້າຮ່ວມກອງປະຊຸມສ່ອງແສງລາຍງານສະພາບໃນການເຄື່ອນໄຫວວຽກງານໂຄສະນາຜ່ານສື່ເອເລັກໂຕຼນິກ (ເວັບໄຊສ໌) ປະຈຳໄຕມາດ IV/2024 ທີ່ຄະນະໂຄສະນາອົບຮົມສູນກາງພັກຈັດຂຶ້ນ (ຜ່ານລະບົບທາງໄກ) ໂດຍການເປັນປະທານ ຂອງ ທ່ານ ວັນຕຸລາ ຣັກນຸດ ກໍາມະການຄະນະພັກ ຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ ແລະ ນໍາພາເຂົ້າຮ່ວມໂດຍ ທ່ານ ນ. ມະນີຈັນ ທໍາມະໂຄດ ຄະນະພັກ, ຮອງຫົວໜ້າຄະນະໂຄສະນາອົບຮົມແຂວງ ພ້ອມດ້ວຍພະນັກງານ ເຂົ້າຮ່ວມທັງໝົດ 9 ທ່ານ, ຍິງ 7 ທ່ານ.
ກອງປະຊຸມ ທ່ານ ວັນຕຸລາ ຣັກນຸດ ກໍໄດ້ກ່າວເປີດ ພ້ອມທັງກ່າວຈຸດປະສົງຂອງກອງປະຊຸມ ຫຼັງຈາກນັ້ນ ຄະນະຮັບຜິດຊອບເວັບໄຊສ໌ ແຕ່ລະແຂວງ ກໍໄດ້ລາຍງານໂດຍຫຍໍ້ຕໍ່ການຈັດຕັ້ງເຄື່ອນໄຫວວຽກງານໂຄສະນາຜ່ານສື່ເອເລັກໂຕຼນິກ (ເວັບໄຊສ໌) ປະຈໍາໄຕມາດ IV ເຊິ່ງມີທັງຂໍ້ສະດວກ, ຂໍ້ຫຍຸ້ງ ຍາກ ແລະ ວິທີແກ້ໄຂໃນຕໍ່ໜ້າ ພ້ອມທັງວາງທິດທາງແຜນການ ປະຈໍາໄຕມາດ I/2025 ເພື່ອໃຫ້ ການນໍາໃຊ້ເຄື່ອງມືເຕັກໂນໂລຊີທີ່ທັນສະໄໝ ເຂົ້າໃນການໂຄສະນາເຜີຍແຜ່ບັນດາແນວທາງ, ມະຕິ, ຄໍາສັ່ງ ຂອງພັກ-ລັດ ແຕ່ລະຂັ້ນ ໃຫ້ສັງຄົມໄດ້ເຂົ້າເບິ່ງ ແລະ ບໍລິໂພກຂ່າວໃຫ້ຫຼາຍຂຶ້ນ.
ໃນຕອນທ້າຍຂອງກອງປະຊຸມ ທ່ານ ວັນຕຸລາ ຣັກນຸດ ກໍາມະການຄະນະພັກ ຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ ໄດ້ມີຄໍາເຫັນໂອ້ລົມ ເຊິ່ງໄດ້ເນັ້ນໜັກບາງບັນຫາຕໍ່ຄະນະຊີ້ນໍາວຽກງານເວັບໄຊສ໌ ຂອງຄະນະໂຄສະນາອົບຮົມແຕ່ລະແຂວງ ຕ້ອງເປັນເຈົ້າການໃນການນໍາພາ-ຊີ້ນໍາ, ຕິດຕາມ, ກວດ ກາ ແລະ ມີການຊຸກຍູ້ ແອັດມິນຂອງແຕ່ລະແຂວງ, ໃນການເຄື່ອນໄຫວເກັບກໍາຂໍ້ມູນ, ເກັບກໍາຂ່າວ, ຂຽນຂ່າວລົງເວັບໄຊສ໌ ໃຫ້ໄດ້ທັງປະລິມານ ແລະ ຄຸນນະພາບ ເພີ່ມຜູ້ເຂົ້າຮັບຊົມໄດ້ຫຼາຍຂຶ້ນ ເພື່ອເຮັດໃຫ້ວຽກງານມີຜົນສໍາເລັດ ແລະ ມີໝາກຜົນທີ່ດີກວ່າເກົ່າ.
