ຄະນະໂຄສະນາອົບຮົມແຂວງວຽງຈັນ ໄດ້ເຂົ້າຮ່ວມຊຸດຝຶກອົບຮົມວິທີການຂຽນຂ່າວ, ບົດຄວາມ ລົງເຜິຍແຜ່ໃນສື່ເອເລັກໂຕຼນິກ ຮ່ວມກັບຄະນະໂຄສະນາອົບຮົມທົ່ວປະເທດ ຈັດຂຶ້ນໂດຍ ຄະນະໂຄສະນາອົບຮົມສູນກາງພັກ ໃນວັນທີ 4-7 ພະຈິກ 2024 ຜ່ານລະບົບກອງປະຊຸມທາງໄກ
ໃຫ້ກຽດເຂົ້າຮ່ວມເປັນປະທານໂດຍ ທ່ານ ນ. ວິລະວອນ ພັນທະວົງ ຄະນະປະຈໍາພັກ ຮອງຫົວໜ້າຄະນະໂຄສະນາອົບຮົມສູນກາງພັກ, ຜູ້ຊີ້ນໍາວຽກງານກົມຂໍ້ມູນຂ່າວສານ ແລະ ຝຶກອົບຮົມ ພ້ອມດ້ວຍຄະນະຮັບຜິດຊອບຊຸດຝຶກອົບຮົມ ແລະ ນັກສໍາມະກອນ ຈາກຄະນະໂຄສະນາອົບຮົມບັນດາແຂວງ ທົ່ວປະເທດ
ເຂົ້າຮ່ວມທັງໝົດ 134 ທ່ານ, ຍິງ 55 ທ່ານ. ໃນນີ້ ຄະນະໂຄສະນາອົບຮົມແຂວງວຽງຈັນ ເຂົ້າຮ່ວມ 8 ທ່ານ, ຍິງ 5 ທ່ານ, ຊຸດຝຶກອົບຮົມໃນຄັ້ງນີ້ໄດ້ມີບັນດາຊ່ຽວຊານ, ອາຈານຜູ້ທີ່ມີປະສົບການບົດຮຽນສູງມາບັນຍາຍເອກະສານ ປະກອບມີ 3 ເອກະສານ ຄື:
1. ທັກສະການຂຽນຂ່າວແບບມືອາຊີບ ແລະ ກຳແໜ້ນວິທີອະທິບາຍ, ຕອບໂຕ້ຖ້ອຍຄວາມບິດເບືອນໃນສື່ສັງຄົມອອນລາຍ ສະເໜີໂດຍ: ທ່ານ ຄໍາວິສັນ ແກ້ວສຸວັນ ຊ່ຽວຊານທີ່ປຶກສາສື່ມວນຊົນສະພາແຫ່ງຊາດ, ບັນນາທິການສໍານັກງານພິມ ແລະ ຈໍາໜ່າຍປຶ້ມແຫ່ງລັດ, ອາດີດຜູ້ຊ່ວຍຫົວໜ້າຄະນະໂຄສະນາອົບຮົມສູນກາງພັກ,
2. ຫຼັກການສໍາພາດຂ່າວ ແລະ ການນໍາສະເໜີຂ່າວທາງອອນລາຍ ສະເໜີໂດຍ ທ່ານ ວັນໄຊ ຕະວິຍານ ກຳມະການຄະນະພັກ ຮອງຫົວໜ້າຄະ ນະໂຄສະນາອົບຮົມສູນກາງພັກ, ຜູ້ບັນນາທິການໃຫຍ່ໜັງສືພິມປະຊາຊົນ.
3. ບາງບົດຮຽນທີ່ຕ້ອງເອົາໃຈໃສ່ໃນການໂຄສະ ນາເຜີຍແຜ່ຂໍ້ມູນຂ່າວສານຜ່ານສື່ແບບໃໝ່ ສະເໜີໂດຍ ທ່ານ ວັນຕຸລາ ຣັກນຸດ ກໍາມະການຄະນະພັກ ຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ. ການຝຶກອົບຮົມຄັ້ງນີ້ ເຮັດໃຫ້ນັກສໍາມະນາກອນໄດ້ຮັບຮູ້ເຂົ້າໃຈກ່ຽວກັບທັກສະການຂຽນຂ່າວແບບມືອາຊີບ, ການຂຽນຂ່າວອະທິບາຍຕອບໂຕ້ໃນສື່ອອນລາຍ, ການສໍາພາດ ແລະ ບັນຫາອື່ນໆ. ເພື່ອເປັນບ່ອນອີງ ແລະ ເປັນຄວາມຮູ້ພຶ້ນຖານທີ່ຈະນໍາໄປໝູນໃຊ້ ເຂົ້າໃນການຈັດຕັ້ງປະຕິບັດໜ້າທີ່ວຽກງານ ແລະ ຖ່າຍທອດຄວາມຮູ້, ປະ ສົບການດັ່ງກ່າວລົງສູ່ບັນດາເມືອງ ຕາມເປົ້າໝາຍການຫັນວຽກງານໂຄສະນາອົບຮົມ ກ້າວໄປສູ່ເຕັກນິກທີ່ທັນສະໄໝໃຫ້ມີຄຸນນະພາບຫຼາຍຂຶ້ນ.
ໃນຕອນທ້າຍ ທ່ານ ນ. ວິລະວອນ ພັນທະວົງ ໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນໍາ ພ້ອມທັງ ກ່າວປິດຊຸດຝຶກອົບຮົມ ເຊິ່ງທ່ານໄດ້ເນັ້ນໜັກໃຫ້ບັນດາທ່ານທີ່ໄດ້ເຂົ້າຮ່ວມຊຸດຝຶກອົບຮົມຄັ້ງນີ້ ຈົ່ງພ້ອມກັນສຶບຕໍ່ເພີ່ມທະວີເອົາໃຈໃສ່ຕໍ່ວຽກງານ ແລະ ຍົກສູງຄຸນນະພາບ ບົດຮຽນທີ່ຮຽນມາໄປນໍາໃຊ້ເຂົ້າໃນໜ້າທີ່ວຽກງານຢ່າງມີປະສິດທິຜົນ ແລະ ຮຽກຮ້ອງມາຍັງຄະນະນໍາ, ຜູ້ຊີ້ນໍາວຽກງານຂໍ້ມູນຂ່າວສານໂດຍສະເພາະ ແມ່ນການຜັນຂະຫຍາຍວຽກງານໂຄສະນາອົບຮົມ ຕ້ອງພະຍາຍາມຊຸກຍູ້ສົ່ງເສີມໃນການເຮັດວຽກງານລົງເລິກເນື້ອໃນ ໃຫ້ເຂົາເຈົ້າເອົາໃຈໃສ່ເປັນເຈົ້າການອໍານວຍຄວາມສະດວກໃຫ້ແອັດມິນ ເພື່ອໃຫ້ວຽກງານຜ່ານສື່ເອເລັກໂຕຼນິກຂອງພວກເຮົາ ກ້າວໄປສູ່ລັກສະນະທີ່ຕັ້ງໜ້າ ແລະ ຂໍໃຫ້ບັນດາທ່ານນໍາເອົາບົດຮຽນທີ່ໄດ້ຮຽນມາໄປຝຶກໃຫ້ບັນດາເມືອງ ເພື່ອໃຫ້ຮູ້ວິທີການນໍາໃຊ້ສື່ສັງຄົມອອນລາຍ ແລະ ເຕັກນິກຕ່າງໆ ໃນການຂຽນຂ່າວ.
ຊຸດຝຶກອົບຮົມໄດ້ປິດລົງ ໃນເວລາ 16:00 ໂມງ ຂອງວັນທີ 7 ພະຈິກ 2024.
#ຂຽນໂດຍ: ນາງ ວິລຸດ ວົງໄຊ
#ກວດກາ-ບັນນາທິການ: ທ່ານ ຈັນທະວົງ ບົວລະພັນ
