ວັນທີ 29 ສິງຫາ 2025 ແຂວວຽງຈັນ ໄດ້ຈັດພິທີປະກາດການຈັດຕັ້ງ ແລະ ໂອນວຽກຖະແຫຼງຂ່າວ-ສື່ມວນຊົນ ມາຂຶ້ນກັບຄະນະໂຄສະນາອົບຮົມແຂວງຢ່າງເປັນທາງການ ເປັນກຽດເຂົ້າຮ່ວມຂອງທ່ານ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ ເຈົ້າແຂວງວຽງຈັນ, ທ່ານ ນາງ ພວງມະລີ ອັກຄະມົນຕີ ຄະນະພັກ, ຫົວໜ້າກົມຈັດຕັ້ງ-ພະນັກງານ ຄະນະໂຄສະນາອົບຮົມສູນກາງພັກ, ບັນດາຄະນະປັບປຸງກົງຈັດການຈັດຕັ້ງຂັ້ນແຂວງ, ຫົວໜ້າພະແນກການ, ອົງການ ອ້ອມຂ້າງແຂວງ, ພະນັກງານຄະນະໂຄສະນາອົບຮົມແຂວງ ແລະ ພະແນກຖະແຫຼງຂ່າວ-ວັດທະນະທຳ ແລະ ທ່ອງທ່ຽວແຂວງ ເຂົ້າຮ່ວມ.
ໃນພິທີ ທ່ານ ເຄນ ເຮືອງຄຳແສງ ຮອງປະທານກວດກາພັກແຂວງວຽງຈັນ ໄດ້ຂຶ້ນຜ່ານຂໍ້ຕົກລົງ ສະບັບເລກທີ 1194/ຈຂ ວຈ, ລົງວັນທີ 19 ສິງຫາ 2025 ວ່າດ້ວຍ ການໂອນວຽກຖະແຫຼງຂ່າວ-ສື່ມວນຊົນ ແລະ ບຸກຄະລາກອນຈຳນວນ 21 ຄົນ, ຍີງ 6 ຄົນ ຈາກພະແນກຖະແຫຼງຂ່າວວັດທະນະທຳ ແລະ ການທ່ອງທ່ຽວ ມາຂຶ້ນກັບຄະນະໂຄສະນາອົບຮົມແຂວງວຽງຈັນ, ຂໍ້ຕົກລົງສະບັບເລກທີ 1231/ຈຂ ວຈ, ລົງວັນທີ 26 ສິງຫາ 2025 ວ່າດ້ວຍ ການແຕ່ງຕັ້ງ ທ່ານ ສຳພັນ ມະນີຈັນ ເປັນຮອງຫົວໜ້າຄະນະໂຄສະນາອົບຮົມແຂວງວຽງຈັນ ແລະ ມະຕິຕົກລົງແຕ່ງຕັ້ງຄະນະພັກເພີ່ມເຕີມ ຈຳນວນ 2 ສະຫາຍຄື: ທ່ານ ຂັນໄຊ ຫຼວງຜ່ານ ແລະ ທ່ານ ສຳພັນ ມະນີຈັນ ເປັນຄະນະໜ່ວຍພັກ.
ຈາກນັ້ນກໍ່ໄດ້ມີການເຊັນບົດບັນທຶກ ມອບ-ຮັບ ວຽກງານຖະແຫຼງຂ່າວ-ສື່ມວນຊົນ ມາຂຶ້ນກັບຄະນະໂຄສະນາອົບຮົມແຂວງ ລະຫວ່າງ ທ່ານ ສີສະຫວາດ ແສງພະຈັນ ກຳມະການພັກແຂວງ ຫົວໜ້າພະແນກ ວັດທະນະທຳ ແລະ ການທ່ອງທ່ຽວແຂວງ, ທ່ານ ສີທົນ ແສງພະຈັນ ກຳມະການພັກແຂວງ ຫົວໜ້າຄະນະໂຄສະນາອົບຮົມແຂວງວຽງຈັນ.
ໃນໂອກາດດັ່ງກ່າວ ທ່ານ ຄຳພັນ ສິດທດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆ ວຽງຈັນ ໄດ້ມອບມະຕິຕົກລົງແຕ່ງຕັ້ງໃຫ້ 2 ທ່ານ ແລະ ມີຄຳເຫັນໂອ້ລົມຕໍ່ພິທີນີ້ວ່າ : ການປັບປຸງກົງຈັກການຈັດຕັ້ງແມ່ນແນໃສໃຫ້ສອດຄ່ອງກັບນະໂຍບາຍຂອງພັກ-ລັດ, ເປັນສ່ວນໜຶ່ງຂອງການປະຕິຮູບລະບົບບໍລິຫານລັດທີ່ໃຫຍ່ໂຕໃຫ້ກະທັດຮັດ ເພື່ອເພີ່ມປະສິດທິພາບ ແລະ ປະສິດທິຜົນໃນການຮັບໃຊ້ປະຊາຊົນເວົ້າລວມ, ເວົ້າສະເພາະ ໃນການພັດທະນາລະບົບຂ່າວສານ ແລະ ເພື່ອສ້າງຄວາມເຂັ້ມແຂງໃຫ້ແກ່ການເຜີຍແຜ່ຂໍ້ມູນຂ່າວສານໃຫ້ມີປະສິດທິຜົນ ຈຶ່ງໄດ້ມີການໂອນວຽກງານຖະແຫຼງຂ່າວ-ສື່ມວນຊົນ ໃຫ້ມາຂຶ້ນກັບຄະນະໂຄສະນາອົບຮົມແຂວງຮັບຜິດຊອບ ເພືອເສີມສ້າງຄວາມເຂັ້ມແຂງໃນການຜະລິດຂ່າວ, ເຜີຍແຜ່ຂ່າວສານ, ພັດທະນາວຽກງານສື່ມວນຊົນ ແລະ ຍົກສູງພາລະບົດບາດຂອງວຽກງານໂຄສະນາອົບຮົມ, ສ້າງຄວາມເຂົ້າໃຈໃຫ້ປະຊາຊົນຮັບຮູ້ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ສ້າງຂ່າວໃຫ້ມີຄຸນນະພາບ ແລະ ຕອບສະໝອງໄດ້ຄວາມຮຽກຮ້ອງຕ້ອງການຂອງສັງຄົມ ໂດຍການກວດສອບຂໍ້ມູນ, ກວດກາຄວາມຖືກຕ້ອງ ແລະ ຄວາມໜ້າເຊື່ອຖືຂອງຂ່າວກ່ອນການເຜີຍແຜ່, ນຳໃຊ້ຊ່ອງທາງສື່ມວນຊົນຕ່າງໆ ເພື່ອສ້າງການເຂົ້າເຖິງຂ່າວສານຢ່າງກວ້າງຂວາງ, ພ້ອມທັງສ້າງວຽກຖະແຫຼງຂ່າວ-ສື່ມວນຊົນໃຫ້ເປັນກະບອກສຽງອັນແຫຼມຄົມຂອງພັກ-ລັດໃຫ້ດີຂຶ້ນກວ່າເກົ່າ.
