ລາວ​ໂທ​ລະ​ຄົມ

              ໃນວັນທີ 27 ສິງຫາ 2019 ຄະນະໂຄສະນາອົບຮົມແຂວງ ໄດ້ສົມທົບກັບບໍລິສັດລາວໂທລະຄົມມະນາຄົມມະຫາຊົນ ສາຂາແຂວງວຽງຈັນ ໄດ້ຈັດພິທີປາຖະກະຖາ 3 ວັນປະຫວັດສາດສຳຄັນຄື: ວັນສ້າງຕັ້ງແນວລາວສ້າງຊາດ ຄົບຮອບ 69 ປີ, ວັນສ້າງຕັ້ງລັດຖະທຳມະນູນແຫ່ງ ສປປ ລາວ ຄົບຮອບ 28 ປີ, ວັນຢຶດອຳນາດ ຄົບຮອບ 74 ປີ ແລະ ຄົບຮອບ 44 ປີ ຂຶ້ນຢູ່ທີ່ຫ້ອງປະຊຸມຊັ້ນ 2 ຂອງບໍລິສັດລາວໂທລະຄົມມະນາຄົມມະຫາຊົນ ສາຂາແຂວງວຽງຈັນ.

        ໂດຍໃຫ້ກຽດເປັນປະທານ ແລະ ຂຶ້ນປາຖະກະຖາຂອງ ທ່ານ ຈັນແປງ ດວງພະຈັນ ກຳມະການພັກແຂວງ, ຫົວໜ້າຄະນະໂຄສະນາອົບຮົມແຂວງ. ເຊິ່ງທ່ານໄດ້ຍົກໃຫ້ເຫັນ ການກຳເນີດ ແລະ ເຕີບໃຫຍ່ຂະຫຍາຍຕົວຂອງແນວລາວສ້າງຊາດ, ມູນເຊື້ອທີ່ເປັນພື້ນຖານໃນ ການເຄື່ອນໄຫວວຽກງານຂອງແນວລາວສ້າງຊາດ, ປະຫວັດຄວາມເປັນມາຂອງວັນຢຶດອຳນາດ 23 ສິງຫາ 1945, ວັນຢຶດອຳນາດໃນວັນທີ 23 ສິງຫາ 1975, ຄວາມໝາຍ, ຄວາມສຳຄັນ ຂອງວັນລັດຖະທຳມະນູນ, ການຈັດຕັ້ງປະຕິບັດລັດຖະທຳມະນູນ ແລະ ກົດໝາຍໃຫ້ມີຄວາມ ເຂັ້ມງວດ ແລະ ມີປະສິດທິຜົນ.

        ການປາຖະກະຖາໃນຄັ້ງນີ້ມີ ຄະນະພັກ, ຄະນະອຳນວຍການ, ພະນັກງານ-ສະມາຊິກພັກ, ພະນັກງານຫຼັກແຫຼ່ງ ແລະ ພະນັກງານວິຊາການ ເຂົ້າຮ່ວມທັງໝົດ 46 ທ່ານ, ຍິງ 20 ທ່ານ.

 

                                                                                                                                                          ຂຽນ​ໂດຍ: ທ່ານ ທອງ​ຄຳ ບຸນ​ປັນ