ໜ່ວຍຮາກຖານຊາວໜຸ່ມ ຄະນະໂຄສະນາອົບຮົມແຂວງວຽງຈັນ ໄດ້ປະກາດຮັບນາມມະຍົດໜ່ວຍ 4 ບຸກ ແລະ ທຸງໄຊນຳໜ້າ 4 ບຸກ ຜືນທີ 2

ລາຍລະອຽດ

ສ້າງຂື້ນເມື່ອ ວັນພະຫັດ, 15 ທັນວາ 2022 03:16

ຂຽນໂດຍ ຄອຮຂຈ

ພິທີປະກາດໜ່ວຍຮາກຖານຊາວໜຸ່ມ ຄະນະໂຄສະນາອົບຮົມແຂວງວຽງຈັນ ຮັບນາມມະ ຍົດໜ່ວຍ 4 ບຸກ ແລະ ທຸງໄຊນຳໜ້າ 4 ບຸກ ຜືນທີ 2 ໄດ້ຈັດຂຶ້ນ ໃນວັນທີ 9 ທັນວາ 2022 ຢູ່ທີ່ຫ້ອງປະຊຸມຄະນະກວກກາພັກແຂວງ ໂດຍການເປັນປະທານຂອງ ທ່ານ ນາງ ດາວວິໄລ ຄຳປັນຍາ ເລຂາໜ່ວຍຮາກຖານຊາວໜຸ່ມ ຄະນະໂຄສະນາອົບຮົມແຂວງວຽງຈັນ, ເປັນກຽດເຂົ້າຮ່ວມພິທີໃນຄັ້ງນີ້

ໂດຍທ່ານ ຄຳເລ້ ໄຊຍະວົງສີ ກຳມະການພັກແຂວງ, ເລຂາໜ່ວຍພັກ, ເລຂາຄະນະບໍລິຫານງານຊາວໜຸ່ມແຂວງວຽງຈັນ ແລະ ທ່ານ ຈັນທະວົງ ບົວລະພັນ ຮອງເລຂາໜ່ວຍພັກ, ຮອງຫົວໜ້າຄະນະໂຄສະນາອົບຮົມແຂວງວຽງຈັນ, ມີຄະນະກອງເລຂາ 4 ບຸກ ຂັ້ນແຂວງ ແລະ ສະມາຊິກພາຍໃນໜ່ວຍຮາກຖານເຂົ້າຮ່ວມທັງໝົດ 21 ທ່ານ, ຍິງ 11 ທ່ານ. ພິທີດັ່ງກ່າວ ທ່ານ ນາງ ດາວວິໄລ ຄຳປັນຍາ ເລຂາໜ່ວຍຮາກຖານຊາວໜຸ່ມຄະນະໂຄສະນາອົບຮົມແຂວງວຽງຈັນ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດ ເນື້ອໃນຂໍ້ແຂ່ງຂັນ 4 ບຸກ ໃນໄລຍະ 3 ປີຜ່ານມາ ຊຶ່ງຄະນະໜ່ວຍຮາກຖານໄດ້ຖືເອົາວຽກງານສຶກສາອົບຮົມການເມືອງ-ແນວຄິດ ເປັນຫຼັກ ໂດຍການນຳເອົາບັນດາເອກະສານສຳຄັນຕ່າງໆ ຂອງຊາດ, ຂອງພັກ, ຂອງຊາວໜຸ່ມປະຊາ ຊົນປະຕິວັດລາວ ມາເຜີຍແຜ່ເຊື່ອມຊຶ່ມຜັນຂະຫຍາຍ ເພື່ອເຮັດໃຫ້ສະມາຊິກໄດ້ຮັບຮູ້ເຂົ້າໃຈຢ່າງເລິກເຊິ່ງ.
ໜ່ວຍຮາກຖານຊາວໜຸ່ມ ຄະນະໂຄສະນາອົບຮົມແຂວງ ປະກອບມີຄະນະໜ່ວຍຮາກຖານ 3 ທ່ານ, ຍິງ 2 ທ່ານ, ມີສະມາຊິກຊາວໜຸ່ມ ທັງໝົດ 17 ທ່ານ, ຍິງ 11 ທ່ານ, ຜ່ານການຈັດຕັ້ງປະຕິບັດຂະບວນການຂໍ້ແຂ່ງຂັນ 4 ບຸກ ແລະ ການກວດກາປະເມີນຜົນການຈັດຕັ້ງປະຕິບັດທັງ 4 ດ້ານ ໃນໄລຍະ 3 ປີຜ່ານມາປະຕິບັດໄດ້ ດັ່ງນີ້:
- ບຸກດ້ານການເມືອງ-ແນວຄິດ ຕີລາຄາໄດ້ 93% ຂຶ້ນໄປ.
- ບຸກດ້ານການຝຶກຝົນຫຼ່ໍຫຼອມຮໍ່າຮຽນ ຕີລາຄາໄດ້ 92% ຂຶ້ນໄປ.
- ບຸກດ້ານວຽກງານການຈັດຕັ້ງ, ດ້ານວິຊາຊີບ, ສ້າງວຽກເຮັດງານທຳ ຕີລາຄາໄດ້ 91% ຂຶ້ນໄປ.
- ບຸກດ້ານການປັບປຸງ-ກໍ່ສ້າງ ການຈັດຕັ້ງຊາວໜຸ່ມ ຕີລາຄາໄດ້ 93% ຂຶ້ນໄປ.

ເພື່ອເປັນການຢັ້ງຢືນເຖິງຜົນງານ ການເຄື່ອນໄຫວຈັດຕັ້ງປະຕິບັດ ເນື້ອໃນຂໍ້ແຂ່ງຂັນ 4 ບຸກ ດັ່ງກ່າວ ຄະນະບໍລິຫານງານຊາວໜຸ່ມ ແຂວງວຽງຈັນ ຈຶ່ງມອບໃບຢັ້ງຢືນ 4 ບຸກ ແລະ ມອບທຸງໄຊ ນຳໜ້າຂະບວນການແຂ່ງຂັນ ເນື້ອໃນ 4 ບຸກ ເປັນຜືນທີ 2 ໃຫ້ແກ່ໜ່ວຍຮາກຖານຊາວໜຸ່ມ ຄະນະໂຄສະນາອົບຮົມ ແຂວງວຽງຈັນ ແລະ ຍັງໄດ້ມອບໃບຍ້ອງຍໍໃຫ້ສະມາຊິກຊາວໜຸ່ມ ຜູ້ທີ່ມີຜົນງານດີເດັ່ນໃນການປະຕິບັດໜ້າທີ່ວຽກງານ ຈຳນວນ 17 ທ່ານ, ຍິງ 11 ທ່ານ.

ໃນຕອນທ້າຍພິທີດັ່ງກ່າວ ຍັງໄດ້ຮັບຟັງການໂອ້ລົມຂອງທ່ານ ຄຳເລ້ ໄຊຍະວົງສີ ກຳມະການພັກແຂວງ, ເລຂາໜ່ວຍພັກ, ເລຂາຄະນະບໍລິຫານງານຊາວໜຸ່ມແຂວງວຽງຈັນ ຊຶ່ງທ່ານໄດ້ມີຄຳເຫັນເນັ້ນໜັກຕືີ່ມບາງບັນຫາ ຄື:
1. ເພີ່ມທະວີຄວາມເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ສະມາຊິກຊາວໜຸ່ມມີນໍ້າໃຈຮັກຊາດ, ຮັກລະບອບໃໝ່, ເຊື່ອໝັ້ນຕໍ່ການນຳພາຂອງພັກ, ຍົກສູງສະຕິເປັນເຈົ້າການ, ຕ້ານ ແລະ ແລະ ສະກັດກັ້ນ ປະກົດການຫຍໍ້ທໍ້ຕ່າງໆ ທີ່ເກີດຂຶ້ນໃນຖັນແຖວຊາວໜຸ່ມ ໃນຂົງເຂດຄວາມຮັບຜິດຊອບ, ມີສະຕິລະວັງຕົວຕໍ່ກົນອຸບາຍຫັນປ່ຽນໂດຍສັນຕິຂອງສັດຕູ ທີ່ຫວັງມ້າງເພທຳລາຍລະບອບໃໝ່ຂອງພວກເຮົາ.
2. ສ້າງຄະນະຊາວໜຸ່ມ, ສະມາຊິກຊາວໜຸ່ມ ໃຫ້ກາຍເປັນຜູ້ສືບທອດມູນເຊື້ອຂອງການປະຕິ ວັດ, ອະນຸລັກຮັກສາຮີດຄອງປະເພນີ ວັດທະນະທຳອັນດີງາມຂອງຊາດ, ຂອງເຜົ່າ, ມີວິໄສທັດກວ້າງໄກ, ເປັນເຈົ້າການຍົກລະດັບຄວາມຮູ້ ຄວາມສາມາດ ເພື່ອຮັບໃຊ້ຊາດ, ຮັບໃຊ້ປະຊາຊົນ, ມີແບບແຜນດຳລົງຊີວິດປອດໃສຂາວສະອາດ, ມີນໍ້າໃຈເອື້ອເຟື້ອເພື່ອແຜ່ ແລະ ມີຄວາມສາມັກຄີ.
3. ເຮັດໃຫ້ການຈັດຕັ້ງຊາວໜຸ່ມ ຄະນະໂຄສະນາອົບຮົມແຂວງວຽງຈັນ ມີຄວາມເຂັ້ມແຂງ ໜັກແໜ້ນ, ກຳແໜ້ນແນວທາງນະໂຍບາຍຂອງພັກ-ລັດ, ກົດລະບຽບພັກ, ກົດໝາຍຂອງລັດ ແລະ ມີຄວາມເປັັນເຈົ້າການໃນການປະຕິບັດໜ້າທີ່ວຽກງານ, ກາຍເປັນກຳລັງແຮງໃຫ້ແກ່ຄະນະພັກ, ສູ້ຊົນໃຫ້ໜ່ວຍຊາວໜຸ່ມກາຍເປັນການຈັດຕັ້ງມະຫາຊົນທີ່ແຂງແກ່ນ ຂອງຄະນະໂຄສະນາອົບຮົມແຂວງ.
ພິທີດັ່ງກ່າວໄດ້ສິ້ນສຸດລົງ ເວລາ 11:30 ໂມງ ຂອງວັນດຽວກັນ ດ້ວຍຜົນສໍາເລັດອັນຈົບງາມ.
#ຂຽນຂ່າວໂດຍ: ເສີດ ຢຳຢວນ
#ບັນນາທິການໂດຍ: ຈ ບົວລະພັນ

• < ຕໍ່ໄປ
• ຕໍ່ໄປ >