ກຳມະບານ

ລາຍລະອຽດ

ສ້າງຂື້ນເມື່ອ ວັນອັງຄານ, 30 ມີນາ 2021 07:01

ຂຽນໂດຍ ຄອຮຂຈ

         ໃນວັນທີ 24 ມີນາ 2021 ນີ້, ກຳມະບານຮາກຖານຄະນະໂຄສະນາອົບຮົມແຂວງໄດ້ຈັດກອງປະຊຸມສະຫຼຸບປະເມີນຜົນຂະບວນການແຂ່ງຂັນ 5 ເປັນເຈົ້າ ຂື້ນຢູ່ທີ່ຫ້ອງປະຊຸມກວດກາພັກ-ລັດແຂວງ,ໂດຍການເຂົ້າຮ່ວມຂອງທ່ານ ແສງທຳ ອາໄພຍະລາດ ຮອງປະທານສະຫະພັນກຳມະບານແຂວງວຽງຈັນ, ທ່ານ ຈັນທະວົງ ບົວລະພັນ ຮອງຫົວໜ້າຄະນະໂຄສະນາອົບຮົມແຂວງ, ມີຕາງໜ້າກຳມະບານຮາກຖານພະແນກການອ້ອມຂ້າງ, ພ້ອມດ້ວຍສະມາຊິກກຳມະບານພາກສ່ວນດັ່ງກ່າວເຂົ້າຮ່ວມ ທ່ານ ນ. ມະນີຈັນ ທຳມະໂຄດ ປະທານກຳມະບານຮາກຖານຄະນະໂຄສະນາອົບຮົມແຂວງ ໄດ້ກ່າວວ່າ: ກໍາມະບານຮາກຖານຄະນະໂຄສະນາອົບຮົມແຂວງ ແມ່ນອົງການຈັດຕັ້ງຫນຶ່ງ ທີ່ຂຶ້ນກັບສະຫະພັນກໍາມະບານແຂວງ ກໍ່ຄື ຄະນະພັກ, ຄະນະໂຄສະນາອົບຮົມແຂວງ ມີພາລະບົດບາດ, ສິດ ແລະ ຫນ້າທີ່ໃນການເຕົ້າໂຮມຄວາມສາມັກຄີ, ປົກປ້ອງຜົນປະໂຫຍດໃນຖັນແຖວພະນັກງານ, ສະມາຊິກກໍາມະບານພາຍໃນຄະນະໂຄສະນາອົບຮົມແຂວງ ຕະຫຼອດເຖິງສະມາຊິກພັກ, ພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າພາຍໃນແຂວງ, ການປະຕິບັດ ເນື້ອໃນຂໍ້ແຂ່ງຂັນ 5 ເປັນເຈົ້າ ໄດ້ເປັນເຈົ້າ.

        1. ດ້ານໂຄສະນາສຶກສາອົບຮົມການເມືອງ-ແນວຄິດ.ໄດ້ນຳເອົາບັນດາແນວທາງນະໂຍບາຍຂອງພັກ, ມະຕິ, ຄໍາສັ່ງ, ຂໍ້ກໍານົດ, ກົດລະບຽບຂອງ ພັກ, ກົດລະບຽບກຳມະບານ, ກົດລະບຽບຂອງກອງທຶນ, ບັນດາມະຕິກອງປະຊຸມໃຫຍ່ ຄັ້ງທີ X ຂອງພັກ, ຄັ້ງທີ V ຂອງອົງຄະນະພັກແຂວງ, ຄັ້ງທີ VII ຂອງສະຫະພັນກຳມະບານແຂວງ ແລະ ນິຕິກຳຕ່າງໆ ຂອງຂັ້ນເທິງ ທີ່ກໍານົດອອກໃນແຕ່ລະໄລຍະ ໄປຈັດຕັ້ງຜັນຂະຫຍາຍ, ເຜີຍແຜ່, ເຊື່ອມຊຶມ ໃຫ້ແກ່ສະມາຊິກພັກ, ພະນັກງານ ກໍ່ຄື ສະມາຊິກກໍາມະບານພາຍໃນຄະນະໂຄສະນາອົບຮົມແຂວງ ຕະຫຼອດເຖິງ ສະມາຊິກພັກ, ພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າ ພາຍໃນແຂວງ ໄດ້ມີຄວາມຮັບຮູ້, ເຂົ້າໃຈ ເຮັດໃຫ້ເຂົາເຈົ້າມີແນວຄິດອຸ່ນອ່ຽນທຸ່ນທ່ຽງ, ມີຄວາມເຊື່ອໝັ້ນຕໍ່ການຊີ້ນຳໆພາຂອງພັກ-ລັດ, ມີຄວາມຕື່ນຕົວໃນການຈັດຕັ້ງປະຕິບັດຕາມແນວທາງນະໂຍບາຍຂອງພັກ, ກົດໝາຍຂອງລັດ ແລະ ຖືກຕ້ອງຕາມຮີດຄອງປະເພນີອັນດີງາມຂອງຊາດ.ຕີລາຄາ ກໍາມະບານຮາກຖານ ປະຕິບັດໄດ້ 97 %.     

     2.  ເປັນເຈົ້າໃນການປັບປຸງແບບແຜນນໍາພາ ແລະ ຂະຫຍາຍການຈັດຕັ້ງກໍາມະບານ.ໄດ້ຢຶດຖື ແລະ ປະຕິບັດຕາມຫຼັກການລວມສູນປະຊາທິປະໄຕ, ເຮັດວຽກເປັນໝູ່ຄະນະ, ບຸກຄົນຮັບຜິດຊອບ, ສຽງສ່ວນໜ້ອຍປະຕິບັດຕາມສຽງສ່ວນຫຼາຍ, ຂັ້ນລຸ່ມປະຕິບັດຕາມຂັ້ນເທິງ, ບຸກຄົນປະຕິບັດຕາມການຈັດຕັ້ງ.ເອົາໃຈໃສ່ຕໍ່ວຽກງານພັດທະນາກໍາມະບານ ເປັນຕົ້ນ ແມ່ນການປັບປຸງແບບແຜນວິທີເຮັດວຽກໃຫ້ແທດເໝາະ ແລະ ສອດຄ່ອງກັບວຽກງານວິຊາສະເພາະຂອງແຕ່ລະຂະແໜງການພາຍໃນຄະນະໂຄສະນາອົບຮົມແຂວງ ສາມາດຕີລາຄາ ປະຕິບັດໄດ້ 96 %.

           3. ເປັນເຈົ້າປົກປ້ອງສິດ, ຜົນປະໂຫຍດອັນຊອບທໍາຂອງສະມາຊິກກໍາມະບານ, ກໍາມະກອນ ແລະ ຜູ້ອອກແຮງງານ ໄດ້ເປັນເຈົ້າການປະກອບຄຳຄິດ-ຄໍາເຫັນຕໍ່ແນວທາງນະໂຍບາຍຂອງພັກ, ກົດໝາຍຂອງລັດ ແລະ ແຜນພັດທະນາເສດຖະກິດ-ສັງຄົມຂອງລັດ ກ່ຽວກັບການປົກປ້ອງສິດຜົນປະໂຫຍດຂອງຜູ້ອອກແຮງງານ ແລະ ຍາດແຍ່ງການຊ່ວຍເຫຼືອ ເພື່ອສ້າງຊັບພະຍາກອນມະນຸດ ແລະ ສິ່ງອໍານວຍຄວາມສະດວກຕ່າງໆ. ຕີລາຄາ ປະຕິບັດໄດ້ 95 %.

      4. ເປັນເຈົ້າເຂົ້າຮ່ວມໃນການຕິດຕາມ, ກວດກາການຄຸ້ມຄອງລັດ, ຄຸ້ມຄອງເສດຖະກິດ, ວັດທະນະທຳສັງຄົມໄດ້ເປັນເຈົ້າການໃນການສ້າງແຜນການໃນເເຕ່ລະໄລຍະ ພ້ອມທັງເຂົ້າຮ່ວມຕິດຕາມ, ຊຸກຍູ້, ກວດກາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງວາງອອກ ໂດຍສະເພາະແມ່ນແຜນການ 5 ປີ, ແຜນຍຸດທະສາດ 2025 ແລະ ວິໄສທັດ 2030 ຂອງຄະນະໂຄສະນາອົບຮົມແຂວງວາງອອກ. ຕີລາຄາ ກຳມະບານຮາກຖານປະຕິບັດໄດ້ 97%.

       5. ເປັນເຈົ້າເຂົ້າຮ່ວມໃນການຈັດຕັ້ງປະຕິບັດແນວທາງການຕ່າງປະເທດຂອງພັກ, ລະບຽບກົດໝາຍຂອງລັດ ໄດ້ເຊື່ອມຊຶມແນວທາງນະໂຍບາຍຂອງພັກ, ກົດໝາຍຂອງລັດ ແລະ ນິຕິກໍາຕ່າງໆ ທີ່ຂັ້ນເທິງວາງອອກໃນແຕ່ລະໄລຍະ, ເສີມຂະຫຍາຍການພົວພັນຮ່ວມມື ແລະ ຍາດແຍ່ງທຶນຊ່ວຍເຫຼືອຈາກສາກົນ ແລະ ປະຕິບັດຕາມການຊີ້ນຳຂອງຂັ້ນເທິງວາງອອກ ທັງສາຍຕັ້ງ ແລະ ສາຍຂວາງໃຫ້ປະກິດຜົນເປັນຈິງ ຕີລາຄາ ກຳມະບານຮາກຖານ ປະຕິບັດໄດ້ 95%.ຈາກຜົນງານທີ່ຈັດຕັ້ງປະຕິບັດໄດ້ໃນໄລຍະຜ່ານມາສະຫະພັນກຳມະບານແຂວງຈິ່ງໄດ້ມອບໃບຢັ້ງຢືນ 5 ເປັນເຈົ້າ ປະຈໍາປີ 2020 ແລະ ມອບໃບຍ້ອງຍໍໃຫ້ກັບກຳມະບານຮາກຖານຄະນະໂຄສະນາອົບຮົມແຂວງໂດຍການມອບຂອງທ່ານ ແສງທຳ ອາໄພຍະລາດ ຮອງປະທານສະຫະພັນກຳມະບານແຂວງວຽງຈັນ ແລະ ຮັບໂດຍທ່ານ ນ. ມະນີຈັນ ທຳມະໂຄດ ປະທານກຳມະບານຮາກຖານຄະນະໂຄສະນາອົບຮົມແຂວງ ພ້ອມດ້ວຍສະມາຊິກກຳມະບານທີ່ມີຜົນງານດີເດັ່ນໃນການປະຕິບັດໜ້າທີ່ວຽກງານປະຈຳປີ 2020 ຕື່ມອີກ.

                                                                                                                                  ຂຽນໂດຍ : ສຸລິຍາ ເພັດວິໄຊ

• < ຕໍ່ໄປ
• ຕໍ່ໄປ >